無錢搭車返屋企？港鐵原來可賒票

馬仔05 · 發表於 2016-5-26 22:41:44

無錢搭車返屋企？　港鐵原來可賒票

無錢都可以搭港鐵？日前facebook專頁「MTR Service Update」發帖指，想搭港鐵就算身無分文，只要向港鐵車站職員求助，他們便會「義助」你一張單程車票，咁筍？東網記者於兩個不同車站進行測試，均成功「賒得」一張單程車票，不過大前提你要擁有香港身份證，當然最重要是有借有還，「賒票」的款項必須7日內歸還。以後發生突發事件無錢返屋企，或者在街頭遇上「跌咗銀包」討車錢人士，都可用此法應付。

記者日前先到港鐵旺角東站進行測試，向票務處職員求助，因丟了銀包，錢財及八達通盡失，可以怎辦？職員問：「咁有冇身份證？」記者回應有，對方即主動表示：「我可以畀張單程車票你，但你要填張申請表，承諾7日內歸還呢程嘅車資...」

原來以「繳付車費協議」借用車票真有其事，乘客只需要填寫個人資料，包括中英地址、電話及身份證號碼，並交身份證予職員核對，簽名承諾7日內歸還車資，便可以借用一張單程車票，金額不限，地區不限，而整個「批核」過程亦「快、靚、正」，約5分鐘便可成功取得單程車票。

如果唔記得或者唔還會點？職員指，若出現有關情況，港鐵法律部便會提告。記者恐會忘記交還車資而要承擔法律責任，事後馬上乖乖歸還車資。記者再在港鐵大埔墟站向票務處職員查詢，職員指「繳付車費協議」一定要有身份證先得，之前有學生試過冇錢搭車，也曾試用此方法解困。不過居於新界西北居民就可能會認為「無着數」，因為輕鐵沒有此服務。

「繳付車費協議」措施，乘客紛紛畀讚。錢同學認為，若自己身無分文但又趕上車的話，有可能在街上問路人借錢，而港鐵這個「賖票」措施免卻尷尬之餘，亦可解乘客燃眉之急。李同學亦覺得「特事特辦」可幫到真正有需要的人，但就不希望有人濫用。

港鐵發言人雖然無回應過去一年有多少人使用過這項服務，但就回覆指有關安排適用於港鐵網絡，但不包括輕鐵線及東鐵頭等車廂，換言之，馬場站、羅湖站甚至機場快綫一律適用，以後外出旅遊就算「洗大咗」，又或者突然沒有現金在身，都不用怕沒有錢搭車回家了。