谷到盡行婚紗騷　張秀文失手露高低pad

man36951 · 發表於 2016-2-14 00:47:13

藝人張秀文出席情人節婚紗展活動，擔任模特兒行騷的她次數不多，險被裙襬Kick倒，她表示自己是首次穿着婚紗行騷，故有少許緊張：「之前只係着過婚紗影硬照。（事前有冇減肥？）新年有節制飲食，原本食10底蘿蔔糕，變咗食6底。（其中一條裙好性感，事前有冇檢查清楚？）有檢查清楚，亦調整咗好多次，有時會綁得好緊，所以要調整鬆緊度。（但打底嘅pad好似出現高低情況？）件pad係連住件衫，縫死咗㗎，會唔會係我擺pose嘅前後錯覺咋，會唔會係角度問題，好啦，我唔搵藉口啦。」

結婚最緊要靚
問到日後結婚會否不介意穿着性感婚紗？她說：「結婚係一世人一次，最緊要靚，同埋要啱當時嘅身形。（新年會否騷價上升？）冇問過，應該唔會，大家都想發新年財。」

單身情人節冇節目
談及明天是情人節，張秀文透露自己沒有節目：「真係冇，我都覺得好過份，不過之前太忙冇放過假，情人節放自己一日假，或者會約單身嘅姊妹食晚飯。（一班姊妹去識男仔？）唔會，我要求好高，好難會一見鍾情，同埋呢啲日子去識男仔，我覺得件事好似好sad咁。（要求點高法？）最高嘅要求就係最簡單嘅要求，最緊要一齊相處開心、溝通到、關心你同錫你。」