腸仔火腿都話致癌早餐食乜好？

F1D1S1 · 發表於 2015-10-27 00:59:54

世界衞生組織將腸仔、火腿、煙肉等港人早餐與下午茶餐必然之選的加工肉類，列為一級致癌物，新鮮紅肉也成為二級致癌物，究竟「食肉獸」重有無得揀呢？營養師教路，到茶餐廳可改吃蕃茄肉碎通代替餐肉公仔麵，學習慢食、食飯時先吃菜及五穀類，最後才吃肉均可減少肉類攝取量。

記者：梁麗兒

註冊營養師潘仕寶表示，午餐肉、香腸、火腿、漢堡扒、臘腸、臘味、罐頭肉類如罐頭鹹牛肉均是加工肉類，不少人誤解食肉多才飽肚，「肉類有蛋白質，可以令人飽肚感維持耐啲，但適量就夠，唔需要咁多」。其實魚肉、雞肉、雞蛋、豆腐、腐竹、豆乾、豆類等食物，都可提供肉類的營養素，包括蛋白質、鋅、鐵及鈣等，同樣可令人食得飽肚。

潘指，市民要均衡飲食，每星期可吃不同的食物，如其中揀一日為「Green Monday」食素，其餘日子每餐均吃不同食物，建設可有3餐食魚、2餐食蝦、帶子，其餘可吃雞肉或適量吃牛、豬等紅肉。

成人每日建議吃5至8両肉類，其中1塊豬扒為3両肉，4隻中蝦或4塊肉片或1隻雞蛋或三分之一條紅衫魚，各為1両肉。若按一般人嗜肉飲食習慣，1餐吃2塊豬扒已達全日建議。

要減少吃肉類，可改變飲食次序，不要一開始便吃豬扒或雞翼，潘建議先吃蔬菜增加飽肚感，然後吃飯等五穀類食物，最後才吃肉類，可減少食肉份量。慢食如每餐至少用20分鐘時間吃飯，也有助減少整體食量。

減少外出進食，盡量在家烹調新鮮肉類，也有助少吃加工肉類或紅肉。若必要外出進食，不妨到食物選擇較多的食肆，到茶餐廳吃早餐可選蕃茄肉碎通、麥皮、粥或芝士三文治，取代吃餐肉公仔麵、火腿通粉等。家庭主婦可改用紅腰豆、什豆做餸菜配料，取代午餐肉或火腿炒飯。魚肉腸仔等小食也屬加工肉類，建議可改吃水果或原味果仁如合桃作小食。

【少肉貼士】
‧改吃雞肉、海鮮、豆腐、豆類及雞蛋
‧減慢進食速度
‧食飯次序依次為先吃蔬菜、五穀類，最後吃肉類
‧每星期揀一日為「Green Monday」
‧減少光顧快餐店
‧吃吞拿魚包、烚蛋三文治取代香腸包、火腿蛋包
‧吃蕃茄肉碎通、麥皮、粥做早餐，取代吃餐蛋麵、火腿通粉

資料來源：註冊營養師潘仕寶