34C歐陽巧瑩冰衣解放：後生唔晒幾時晒

man36951 · 發表於 2015-10-17 23:18:15

明年8月是四年一度的國際體壇盛事奧運在里約熱內盧舉行的日子，《好報》早前獨家披露無綫將出動「八大咪神」，組成名為「U20」的超級女團擔任奧運節目Angel！向來以健康性感及活力見稱的歐陽巧瑩獲欽點成為團中重心人物，她笑說：「我都係睇新聞先知，唔知係咪真係成事，如果係就當然開心，因為奧運係四年一次嘅盛事！我哋8個女仔圍內有傾過，我又咁啱個個都識、個個都熟，之前同Toby（陳庭欣）傾偈，佢做領軍，我都忍唔住叫佢一聲『大姐姐』！」
「蝶背蛙自」瓣瓣掂
現年22歲的她笑言團名不應是「U20」，應改為「U30」：「我哋嘅年紀都過晒20歲，應該改名叫『U30』先啱！」除了Tammy，獲睇好加入「U20」的成員還有陳庭欣、陳婉衡、范文雅、張秀文、陳瑋琪、劉溫馨及林泳淘，人緣向來極佳的Tammy大方點評一眾好姊妹：「如果真係要點評佢哋，咁我只可以話我最鍾意陳婉衡！我成日見到佢，拍嘢又經常一齊拍，連我作為女仔都心動，佢身材真係好到冇得彈！至於喺奧運知識方面，當然揀Toby啦！佢之前都做過，知道好多相關資訊，所以呢兩個姓陳嘅都好掂！」
Tammy向好姊妹笠高帽，但直言自己也有個人優勝之處，熟水性的她原來是一名游泳健將，泳術甚至媲美專業泳手：「我嘅優勝之處呢……夠冷酷囉！講笑咋！其實我以前真係游開水，仲有玩跳水，『蝶背蛙自』四式都OK。一個人愈精一樣嘢、對嗰樣嘢愈有興趣，做起嚟就更加得心應手！如果叫我講啲完全唔識嘅項目，例如欖球同體操呢啲就極之唔熟，咁啱講游水會好開心！如果話有咩優勝地方，就係我有一樣專長！」
身材弗爆的Tammy不時大方晒相騷Quali，更參與泳衣騷任睇唔嬲，問到會否擔心觀眾認定她靠身材上位？她貫徹敢言作風說：「趁住後生唔晒幾時晒？」她續說：「我一啲都唔驚人哋話我靠身材上位，坦白講，我覺得自己身材唔係特別好，又唔覺得特別豐滿，好似上次行泳衣騷，其他3個女仔一睇就知大好多啦！同我嘅上圍差得遠。我覺得無謂比較邊個身材最好，最緊要係出嚟個感覺舒服。大家話我大方又唔係咩壞事，我肥嗰陣就肯定唔會大方，如果Keep得好、出嚟效果又健康，趁後生咪晒吓囉！如果去到30幾歲嗰陣仲着套泳衣行出嚟，我都擔心人哋會點睇我！我會咁睇啦，如果係靚就趁後生晒吓！」

冇信心Keep到老
最近「美魔女」當道，有「五十胸」之稱的羅霖以半百之齡出寫真，更紅遍國際！尚有近30年才滿50歲的Tammy聞言打定輸數，笑稱沒有毅力挑戰「活到老，Keep到老」：「Keep到我一定出（寫真）啦，但我諗比較難喇！我都清楚如果50歲仲要Keep到咁真係要好大努力同好有恒心，大家都係女人，知咩事啦！咪話50歲，就算到40歲Keep到身材，都要Keep埋皮膚同個樣，所以真係難！」

由參選港姐到入行發展，Tammy最初只為與朋友拍住上，後來逐漸對演藝事業產生興趣，愛廣交朋友的她在圈中不乏知心好姊妹：「一開始係楊晴話：『不如一齊去選啦！』跟住就一齊報名，之後佢有合約問題玩唔到呢個比賽，我收到無綫電話就繼續玩，所以一開始只係同朋友試吓、學多啲嘢見多啲，一路做落去識咗一大班朋友。第一個識嘅係阿Moon（劉佩玥），我同佢幾啱傾，後來仲發現我哋原來有一大班圈外共同朋友！」

Tammy入行以來主持過多個節目，今年6月在沙巴拍攝J2節目《3日2夜》時遇上地震，令向來Man爆的她都大叫怕怕：「最深刻係去沙巴遇上地震，係人生第一次經歷地震，依家都仲記得嗰陣嘅感覺！嗰刻真係幾驚，因為沙巴唔係成日發生地震嘅地方，唔同去日本，你會對當地建築同緊急疏散措施有信心，但沙巴幾乎冇試過地震，所有建築物同人民對地震嘅危機感都偏低。我知道地震嗰陣，當地所有人都勁驚慌係咁跑，我哋作為遊客一定更加驚！我當時即刻諗起好多有關末日同大災難嘅電影，真係唔知下一分鐘命運會如何，但就算遇到地震我哋都堅持拍完節目，做完覺得自己好叻，出到嚟個樣都仲係笑緊！」

天生黑面最自在
Tammy對主持工作逐漸上手，她坦言對拍劇及拍戲都有興趣，更挑選了最具挑戰性的兩大角色：「我想試吓做精神分裂症患者或者做甜美少女，我平時比較冷漠，有試過去搵會令自己開心嘅事，但原來唔使笑就可以令我開心！如果我真係做甜姐兒嘅話，啲朋友應該會即刻同我絕交！」

月前，Tammy與男友林師傑公開戀情，經常被拍得出雙入對，感情穩定。Tammy性格爽朗，不論是工作需要還是私下生活，她都樂於展示姣好身材，問到男友會否詐型呷醋？她笑稱男友只會投訴她肥，又大爆彼此的相處方式是互相取笑，愈窒愈開心：「我瘦嗰陣佢就唔會詐型，肥嗰陣就會話：『核突呀！』我哋之間嘅溝通方式係咁，會互相取笑，當係互相監督！」

她又坦言身為藝人無時無刻都要保持警惕：「始終做呢行包裝好緊要，冇理由出到嚟呢度一舊肉，嗰度又一舊肉！」提到男友緋聞多多，Tammy自爆彼此由朋友昇華到戀人關係經歷了很長時間，林師傑過往的緋聞她統統知道，但百分百信任男友：「我唔介意佢以前啲緋聞，我哋做咗一段時間朋友先一齊，佢以前所有嘢我都知得一清二楚，佢冇必要呃我。我本身性格豪爽，有嗰句就講嗰句，兩個人之間乜都講，最緊要知道佢依家係咩人就得！」