陳庭欣蜜桃胸發圍　欽點孭飛迎奧運

man36951 · 發表於 2015-8-7 09:28:07

花旦向來是無綫重要資本，惟近日無綫鬧花旦荒，繼視后胡杏兒離巢後，另一花旦徐子珊約滿後亦傳不再續約，令一眾高層大感頭痛。明年8月將在巴西里約熱內盧舉行四年一度體壇盛事奧運會，無綫更是不容有失，適逢近期多位新紮咪神如張秀文、陳婉衡、歐陽巧瑩等成功迷倒宅男。
最新一期《好報》披露無綫一於食住條水籌備捧女大計，組成全新索女組合「U20」，訓練成「睇得、Talk得、跳得」的奧運Angel。據悉，前港姐冠軍陳庭欣被高層欽點加入「U20」，眾女勢必爭崩頭求突圍，爭上當家花旦之位。
據知，「U20」將於年底進行公開招募，除了內部揀蟀外，亦會對外「徵兵」，甚至會海外招攬索女，入圍者會進行秘密特訓成全能藝人，務求聲色藝俱全，形式類似日本人氣女團AKB48，一於玩大堆頭，唔憂冇花旦人選。

備戰明年巴西奧運
早前在社交網大晒比堅尼照成為話題的Toby，得知被欽點入「U20」開心到震，近日積極操弗Body。她激罕接受本報水着專訪，勁晒C Cup蜜桃胸。對於獲欽點，她興奮地說：「公司依家鋪緊路搞奧運，預埋我一份，我會先為奧運跳Opening Dance，類似森巴舞嗰種。其實出年8月就係巴西奧運，距離依家仲有一年，公司同我都要有所準備同鋪排，首先我要惡補一吓體育知識，好彩之前做過世界盃主持，對呢方面主持經驗有打定底，不過真係仲未夠，希望再豐富自己體育知識，咁先可以做到奧運大使。」

演姣精至有Noise
貴為港姐冠軍，Toby大多專注主持工作，面對一眾港姐師妹陳凱琳、蔡思貝及劉佩玥等逐一上位，對她來說絕對不是味兒，Toby說：「我入行五年喇！見到師妹有咁多機會，佢哋年紀又細過我，的確有啲着急，我要急起直追，老實講，呢幾年喺演戲方面真係唔突出，只係做人哋嘅女朋友，《單戀雙城》係咁，新劇《樓奴》都係咁，見到《鬼同你OT》楊秀惠做一個姣嘅角色有咁多回響，真係幾羨慕。其實我唔介意做呢啲角色，姣精又好、小三又好都唔介意！」問是否覺得師妹對她做成威脅？她只說：「依家係時候要為自己Set定計劃，眼見好多同事向外發展，好似杏兒咁都有好好成績，我依家張約仲有年幾兩年，如果最後選擇留低就要加把勁，希望日後可以係角色上面有所發揮。」Toby認為即使被認定是「最強小三」或「狐狸精」也不影響形象：「唔怕，演戲嘛！演到入木三分，畀人覺得我姣仲好，有Nosie嘛！我一啲都唔介意，知道要演另類角色先可以突圍！」

既然不介意演繹「姣精」角色，問陳庭欣自覺有沒有姣的潛質？她笑言並非姣底，除了Body外，性格上沒有姣的基因：「講真，姣對我嚟講真係搭唔上嘴，哈！除咗我副Body，其他嘢都冇姣嘅潛質，我講嘢冇尾音，點姣啫？所以要揣摩角色，真係要搵個對象姣吓至得，又或者學其他女仔點姣，偷用吓佢哋嘅招數！」

去沙灘「目及」仔
做得奧運大使，運動細胞當然要有番咁上下，原來Toby果真入水能游出水能跳，她說：「不嬲好鍾意運動，平時有跑步、游水同打泰拳，喺屋企會做拉筋，以前仲係Hockey（曲棍球）校隊添哈哈！依家有咁弗嘅身形都係靠做運動做番嚟！」她自爆平時最鍾意去沙灘，可以曬得一身古銅色之餘，更可以攞正牌「目及」仔：「每年夏天都Plan去船河同東南亞地方曬太陽，好羨慕外國人個Body靚之餘又一身蜜糖色，真係好鍾意。喺沙灘我有個習慣，就係男女都「目及」，每年泳裝都有新款，所以覺得沙灘好多嘢睇，依家小朋友泳裝勁得意，所以我每次去沙灘對眼都好忙。」