[轉載] : 5分鐘有海鮮食, 教你整清酒煮蜆

hkwatcher · 發表於 2015-4-3 14:57:27

有睇過日本漫畫都知，Sex、靈異、權力，暴力、仲有飲食，幾乎係每套出名漫畫一定有嘅元素。

你可能四大皆空，無宗教信仰、不戀棧名利、又熱愛和平，咁阿先生，你都會肚餓，要食飯㗎嘛，對食物總無理由毫無反應掛？講真，漫畫裏面啲食物咁好味，啲公仔表情就夠晒誇張交足戲嘞，想試，唔通要搵多啦A夢幫手？

多啦A夢就冇嘞，Andy Dark就一大個喺度準備醒你幾招，之後一連4集，Andy都會教大家煮漫畫菜式，chok定把聲等住講︰「O-i-shi！！」啦！

Andy話睇中近年熱爆嘅《深夜食堂》，OK，睇吓今集煮乜先 ? 煮乜先 ?

hkwatcher · 發表於 2015-4-3 14:57:28

日本漫畫家安倍夜郎作品《深夜食堂》，可以被界定為非一般飲食文化漫畫，當中包含治癒心靈成份，令不少夜半先食晚飯嘅打工仔非常受落，因而屢獲獎項︰包括2010年奪得第55屆（平成21年度）小學館漫畫賞「一般讀者類別」獎項；同年又獲得第39屆日本漫畫家協會獎大獎。嚟緊仲有電影公演，非常巴閉。

《深夜食堂》故事講述新宿街頭一條後巷內的小食堂，營業時間由深夜0時至早上7時，常客都稱之為「深夜食堂」。菜單雖然好簡單，只有豚汁套餐同酒，但老闆話，只要自己可以造到的食物，顧客都可以take order。故事就以食堂為舞台，描述老闆與客人的心靈交流。

Andy Dark教大家煮的第一道《深夜食堂》菜式，就係清酒煮蜆..........蜆........啊蜆

hkwatcher · 發表於 2015-4-3 14:57:29

本帖最後由 hkwatcher 於 2015-4-3 14:40 編輯

清酒煮蜆出現於《深夜食堂》第3集第39夜「酒蒸蛤蜊」（台灣新經典文化出版社譯名）。

呢回講述阿蓮姨每次到深夜食堂，必點清酒煮蜆。

當中揭露阿蓮姨老公因外遇而離開自己，又留下一大筆債務，阿蓮姨本來打算帶埋囝囝阿丈自殺，中途走累了，便到一間小食堂用餐。

阿丈第一次食清酒煮蜆，感到非常好味，一連食了3碟。

hkwatcher · 發表於 2015-4-3 14:57:30

阿蓮姨見到囝囝食得津津有味的樣子，先打消了尋死念頭。

係唔係好感人嘅呢？我同Andy都睇到有少少感觸啊！

Andy Dark教大家煮感人肺腑嘅清酒煮蜆，煮法其實好簡單，包你試多幾次之後實會上手，隨時成為你招呼朋友嘅撚手小菜，清酒煮蜆喎，你話你幾有日本飲食文化嘞！唔係話叫你靠呢味餸扮日本廚神，然後喺女性朋友面前認dee認屁，但我覺得真係型囉。

話時話，食蜆最怕有沙，最簡單方法，可以喺街市買蜆時，向老闆要已過夜冇沙嘅蜆。如果買到有沙嘅，唔使怕煩，可以將蜆放入清水，加1、2茶匙鹽，然後用紙蓋著裝著蜆的碗或細盤，以遮擋光線，3、4小時後，蜆便會完全吐沙。（Share埋畀老媽子同外母聽啦）