前港視員工分析港視困境

simontonysoup

(轉載）前港視員工, 深度分析港視困境


作為港視前員工, 見到港視今日既困境無不心痛。坊間亦有好多對港視, 以致整個電視行業既意見, 當中有不少高見, 亦有不少誤解, 因此想借呢個機會, 以一個行內人既身份, 同大家深入分析港視同香港電視業既生態。


電視行業要生存, 離不開三大關鍵元素, 包括製作, 觀眾同廣告, 本文亦會集中係呢三個範疇評價港視表現。


製作
一個電視台就好似一間工廠咁, 佢既產品就係電視節目, 要營運一個工廠, 就需要不同既生產要素配合,包括廠房, 機器, 原料, 人手等等。大台之所以雄霸本地電視市場多年, 就係因為佢有極之充足既生產要素, 電視城即係廠房, 拍攝/錄音器才就係機器, 梳化服道具就係原料, 藝人/製作團隊就係人手, 呢幾方面大台累積左40幾年既本錢。大台而家每日營運緊4條24小時廣播既頻道, 當中包括電視劇, 新聞, 音樂, 體育, 資訊文教, 兒童節目, 長者節目等等, 冇穩定既生產要素, 根本冇可能提供足夠既節目去填滿呢24 小時。而當一條production line 要做mass production 時, 就要標準化生產水平, 所以點解大台既電視劇劇情咁例牌? 因為mass production 既後果就係例牌, 但好處係可以掌握到生產時間同數量。


反觀港視, 未有電視牌已經開始拍劇, 以當時港視具備既條件黎講, 呢一步係商業上係極高風險的。首先, 冇自己既錄影廠, 即係要租人地既地方拍野, 所以你見港視劇集都係實景拍攝, 雖然有利觀眾視覺享受, 但成本亦因此大增。另外, 由於冇牌, 冇咩藝人會同你簽一張長約,因為藝人都唔想綁死自己係一個未知受唔受歡迎既電視台, 肯簽既亦都只會係一D唔太出名既三四線藝人。大卡士就只能用部頭約, 一套劇一套劇咁簽, 呢D 當然亦反映番係成本上。


淨係劇集已經咁大鑊, 如果港視真係要開一個有牌電視台, 仲要有埋新聞部, 綜藝組, 兒童組, 音樂組, 而且電視牌照仲規定要有一個英文台,以港視既製作資源, 其實冇可能係短時間內符合要求, 所以當年政府認為港視未有能力有效營運, 而拒絕發牌, 亦未必冇道理, 當然我亦絕對相信有政治因素影響。


觀眾
雖然港視成本高, 但畢竟製作左好多有新鮮感既劇集, 當中我認為不少水準是高於大台的, 而大台既劇集水準被人詬病左好多年, 但點解港視除左開台頭一個月帶黎過一D 衝擊之後, 就無以為繼呢?


其實大台好明白香港觀眾需要乜野, 香港人睇電視劇, 只係需要一樣野 – 偶像! 大台由唔知幾多年前既「五虎將」, 到今年既「四個女仔」,其實都係培育新一代偶像接上一代偶像棒, 因為觀眾需要新鮮感, 新面孔, 只要成功塑造到偶像, 就會有粉絲追捧, 劇集有noise 就有人睇。


港視劇集以資深實力派演員為主, 確實位位功力深厚, 但亦過左偶像之年, 觀眾係好現實的, 咁多好劇之人拍港視劇集, 最後而家紅左出黎既係王宗堯, 仲一下子升呢做男神, 講實力佢未至於, 但佢有做偶像既條件, 呢個就係娛樂圈。


港視另一死穴, 就係無法入屋。 觀眾除左現實仲好懶, 要佢地刻意login 睇一個節目, 除非真係好吸引好有話題性, 如果唔係根本冇原因去咁做, Smart TV 既點播功能亦未見眉目, 面對多種限制, 港視既觀眾群收窄亦不意外。


廣告
廣告係免費電視既收入來源, 有觀眾就有廣告, 一字咁淺。但大家唔好意為而家港視冇廣告係因為收視差, 其實再差既媒體都會有廣告收入, 只要你收番個合理價就得, 我都唔明巴士電視點解咁多廣告, 有人睇架咩? 但其實佢收得好平, 所以總會有一班自己既客路。


港視廣告收入差, 原因係廣告商預計唔到收視。睇番港視既收視報告, 基本上由開台第一個星期就一直跌, 大家都唔知幾時先見到底, 情況就好似一隻股價一直摸底既股票, 未跌定前買等如空手入白刃。廣告商做一個宣傳計劃, 快則都一個月。港視個勢係咁跌, 今日決定買, 可能一個月後得番一半收視, 廣告費就相對地升左一倍, 呢個風險點個敢冒? 所謂廣告商其實即係一間公司既marketer, 佢地落廣告前都要預計成效同老板交代, 萬一真係出現以上情況, 呢個鑊就要由建議用港視既marketer去咩, 你係佢你會唔會建議港視?


大台最令廣告商又愛又恨既就係慣性收視, 呢種慣性, 令大台一年365 日入面有九成日子既收視都可以預計到, 對marketer 做planning, 尤其係大型宣傳計劃尤其重要。


另外, 觀眾少都唔緊要, 目標清晰就可以, 而家港視既觀眾群, 究竟係屬於咩年齡層, 男女比例, 入息水平等都冇咩清晰定位, 咁廣告商點知係港視落廣告接唔接觸到target audience?


大台因為接觸面闊, 所以好多廣告商都會岩, 另外雖然話大台係師奶先會睇, 但師奶本身就係一個好清晰既定位, 所以FMCG 廣告商始終離不開大台, 是有其原因的。

王Wiki 有何好橋?

HKOXSEX

5知有幾多,係網絡鬧政府5發牌D人,會睇港視.
我就覺得台越多越好,
但港視就吸引5到我 login.
我都5知男神王宗堯添

宝贝甜心

開台有看過一集警匪劇集，名唔記得。
大口青做警司，成70歳人，太老与角色不配，
應是財力所限，之後都無繼續看下去。
CY可能唔想王wiki蝕去20億卦！

Topvision

我說慣性收視, 不如說是慣性收視點數

有幾多人有開電視習慣 ?
又有幾多人開電視, 只係想家中有少少聲.....
又有幾多人真係用心去睇垃圾嫁.....

我唔多睇, 間唔中都會開少少時間....
原因只不過係聽吓會否有咩大新聞....
無, 咩又係熜返佢.   因為無線無咗六叔之後, 真係完全唔得

jj99

盒仔上網睇過兩集黑霉貴係你阿媽，人物OK， 搵D 老餅做， 但 劇情 睇兩集已唔想睇！！

controllboy

現在正在播出的"熱火新聞線" 好好看, 拍得好有電影感, 希望多些人支持, 我覺得王先生有心去和大台比併, 但未比併便給政府用不同的方法去阻止佢向市民播放佢做的節目, 接受還是不接受, 關政府乜事? 佢地晚晚都好Q 忙, 那有時間看電視, 点知民間的需要, 難道好似現在的ATV, 有頻道但有乜嘢給人看, 這個政府, 根本不是為人民著想的, 王先生, 請努力, 知其不可以為而為是好辛苦, 但香港內有好多人都支持你, 雖然, 現實一点, 沒有錢, 我們支持沒有用, 但都請你尽力吧, 失敗不在你, 而輸在現在的政府和那些不知給洗腦的香港人

simontonysoup

我有smart Tv, 但我對劇集冇興趣，所以都冇裝HKTV。
喜歡追劇的多是主婦，但未必識裝。
開台時的支持者，好多係唔抵得政府唔發牌，為Wiki打氣的，
而這班人有幾多會追劇？相信新聞節目啱口味多D。
覌眾流失，是意料之中吧。