又係睇腳時間 - 吳若希42吋腿長勝謝安琪

leungping23 · 發表於 2015-2-2 09:30:57

《第十屆勁歌王金曲金榜年度音樂盛典》前晚於廣州舉行，頒獎禮變成女神戰場，眾女歌手鬥「吋」晒長腿之餘又盛況「胸」前吸睛，憑洗腦歌《越難越愛》上位的吳若希穿上Tube Dress連身短裙，騷腿又露底「雙招齊發」，42吋白滑長腿一覽無遺，而人妻謝安琪的38吋長腿則包到冚，明顯輸蝕！
前晚於廣州舉行的《第十屆勁歌王金曲金榜年度音樂盛典》，上演一幕幕長腿大對決。首先有新紮女神之戰，吳若希（Jinny）露42吋長腿勁撼「長腿姐姐」連詩雅（Shiga）同樣42吋的光管腳，穿上露肩連身短裙的Jinny憑熱爆歌曲《越難越愛》勇奪「我最喜愛歌曲大獎」及「粵語金曲獎」，受訪時意外露出黑色打底褲。
對於早前有傳她曾食安眠藥為情自殺，她立即否認：「唔係為前男友自殺，當時小腹生水瘤、把聲有問題、又有情緒病同失眠，食咗十幾粒安眠藥，喺度呼籲大家唔好亂食，多謝關心！」又有指她與富商王弼燮玩忘年戀，她表示要跟對方講不好意思：「下次請番佢食飯！」她坦言恨桃花：「冇人追呀！嚇走晒啦，身邊朋友都被起底唔敢搵我！我平時講嘢大聲又玩得癲，可能令人唔鍾意，真係要收斂，唔想得罪人！」
Shiga情人節開工
至於對手Shiga則以一襲高貴短裙上陣，她表示情人節要在工作中度過，男友亦暫時未約她，問到是否跟男友過首個情人節，她說：「人大咗好少講咩第一次，工作為先！新年會放幾日假，返屋企拜年，不過就唔會帶男朋友，傳統係結咗婚先！」對決陸續有來，接着上演人妻大鬥法！
雖然「榮譽女神」謝安琪（Kay）讓賽收起美腿，使出透視誘惑的她仍甚有睇頭，硬撼同是幸福人妻的官恩娜（Ella）！Kay在頒獎禮中成為「勁歌后」，她感謝大會在過去十年的支持：「2015係我入行十年，同大會頒獎禮一樣係十年，年年我都有嚟，令我好踏實，畀好多肯定我！」她又稱會舉行巡唱：「未知喺邊開始，等公司去傾。」
最近她忙拍無綫新劇《殭》，拍至5月底又要到荷蘭拍三至四星期，她透露與同劇的鄭嘉穎、黃又南及陸永自組武術班：「我改咗叫『狂家班』，唔勁都有氣勢吖！不過嘉穎又再改過，你問佢啦，我唔方便講！」對於拍劇難免有是非，她說：「睇落冇喎，我哋工作得好愉快！」
Sherman獲祖兒讚賞
身穿背心短裙的Ella則大騷42吋索腿，記者再追問婚期，她仍三緘其口：「差唔多啦！會同大家分享，始終雙方家人都好低調！（情人節當日？）遲啲大家就知，愈近壓力就愈大，已經準備好晒！」她直言不會未婚生子：「我知好多人生咗先結婚，不過我會一步一步嚟，唔會有意外。」
最後一組是「孖住鬥」，As One派出兩人騷美腿大鬥「鍾氏姊妹花」鍾舒漫（Sherman）及鍾舒祺，露出40吋長腿的Sherman獲「飛躍歌手獎」，與妹妹合唱的歌曲《SS14》亦奪得「最佳合唱歌」，她指最近為《SS14》製作了終極喪版MV：「我放咗上網，容祖兒都Forward出嚟讚，多謝佢嘅鼓勵，佢WhatsApp我讚我哋Idea好，要Keep住再做好啲！（好事近？）未有耐！」而缺席的祖兒亦勇奪「我最喜愛歌手大獎」。