[轉載] - 新鮮皇帝蟹二食与和牛墨西哥捲

cegong

[轉載] - 新鮮皇帝蟹二食与和牛墨西哥捲

啱啱呢個禮拜拿了年假，作為一個喜歡煮嘢食嘅人嚟講，咁得空諗下整番两味特别的靓餸，
今次會整《蒜蓉蒸，蟹膏粉絲底》同《生滾粥》加多一样和牛墨西哥捲，當然啦！咁正的食物禾一定要同大家分享下啦！

新鮮皇帝蟹二食


一般大家買啲皇帝蟹唔係淥熟即時急凍果啲，就係一碌碌急凍腳。其實肉質真係麻麻，又得個鹹字，咁嘅嘢，不如掉咗去咪食。
有冇諗過自己買隻新鮮嘅番屋企整？皇帝蟹最細嘅應該三斤幾，因唔會好似龍蝦個頭殼咁重，其實經已夠三四個人。至於幾錢，我諗個個街市唔同。百二至二百蚊一斤，depends 咩時間去。我覺得算幾抵，因急凍嘅都未必買到。

cegong

首先當然係新鮮皇帝蟹一隻。粥，當然要米啦，一杯到杯半，啲人話最好用珍珠米，其如仲有粉絲，同蒜蓉。


先講粥底，第一件事浸米先，要落少少鹽，同油，浸大概兩三個鐘。浸好就攞個瓦煲，二至三公升水，大火煲滾後落米，keep 大火煲一個鍾，再轉細火煮多一個鍾，咁個粥應該會棉㗎啦！期間要睇火，唔夠水就加水，同小心好易滾瀉，如果唔係瓦煲，火力唔平均，極有可能黐底及燶，小心。

其實米同水嘅份量好難講幾多，好睇你鍾要有幾杰，請自己衡量。


處理隻蟹前，熱水浸粉絲。

cegong

攪隻蟹！呢種蟹殼較軟，一般廚剪夠應付。好，先打開蟹蓋。揭開底部塊奄，原邊剪。基本上，佢郁得好慢，驚的話攞筷子桶死佢先。


小心連奄扯開。


啲膏藏係蓋同奄裡面，剪開個奄撩哂出嚟先。


剪晒啲鰓出嚟。

cegong

再剪逐隻腳出嚟。


個身就剪開八舊。


係，我知好煩，就得㗎啦。Last step， 啲腳用刀仔係面批一大個窿，呢個步驟請小心手。


好，隻蟹終於處理好！準備煮佢嘞！張浸咗嘅粉絲撈埋頭先啲蟹膏放碟底。

cegong

蟹腳放面。


係啲窿窿上落蒜蓉，咁就蒸得嘞。


但蒸之前，假設你個粥底煲好，落幾粒薑，頭先啲蟹身，蟹鉗，同蟹蓋大火滾七八份鐘。

cegong

係個粥煲緊嘅時後，蒸蟹腳。大火滾水蒸五分鍾。


超鮮味係粥攪掂！乜調味都唔需要。


切蔥花，切段後再切絲。


蟹爪最後淋滾油，同蒸魚豉油攪掂！

cegong

和牛墨西哥捲 (Taco)


其實我平時唔係餐餐都一定煮中式嘢，不過今次呢個 taco 實在太正，一定要 share 下先得。正所為唔肥唔好食，今次都唔例外，呢個 Taco 極之極之 heavy，和牛，牛油果，sour cream，問你死未，整少少兩三個人 share 下好啦。

cegong

玉米餅 (tortillas)，一般高級少少嘅超市有得賣。


和牛牛扒，和牛油份多，會鬆化啲，又香啲。當然其他種類都得，隨你喜歡，唔係個個都鍾意咁肥，Anyway， 我諗預 100 gram 一件 taco 咁上下，Sirloin 或肉眼都得。

而我呢個係澳洲和牛嘅牛腱肉，較平。


sour cream - 酸忌廉。


牛油果，細 size 的話，預一件 taco 一個。

cegong

蕃茄一個。


洋蔥半個，同青蔥。


洋蔥切粒。


蔥切粒。

cegong

蕃茄切粒。


好，咁點解我話要牛扒呢，因為要切片，超薄片。講緊半mm咁上下。如果你真係唔食切嘢，咁都冇你計，買打邊爐果啲牛肉片切碎頂住先。靚啲嘅牛唔該！


切好落少許 seasoning salt 撈下佢。冇 seasoning salt的話，落啲蒜鹽，黑胡椒咁都得。


牛油果醬，肥得很。牛油果肉用叉壓爛，落少少鹽，少少檸檬汁及一大湯（果兩個牛油果咁計）羹酸忌廉攪混就得！封口放雪櫃雪一陣。

cegong

好，開始煮嘞！首先中火白鑊燒玉米餅每邊大概兩分鍾。見有少少黃黃哋就好了。燒好放埋一邊備用。


牛油爆香洋蔥至軟身。


跟手落埋啲牛肉炒至七八成熟即熄火。


極速放牛肉上玉米餅，避免牛肉過熟，再落牛油果醬，蕃茄粒，同蔥粒就攪掂！

大家睇到係末流口水呢！

   

milito22

和牛taco...睇到都流口水

parma

食蟹已經夠晒

cegong

parma 發表於 2014-11-2 20:15
食蟹已經夠晒

整少少墨西哥捲,俾大家过下瘾  

parma

cegong 發表於 2014-11-2 20:26
整少少墨西哥捲,俾大家过下瘾

禾5直牛

LasCases

cegong 發表於 2014-11-2 16:37
[轉載] - 新鮮皇帝蟹二食与和牛墨西哥捲

啱啱呢個禮拜拿了年假，作為一個喜歡煮嘢食嘅人嚟講，咁得空諗下 ...

蟹煲粥超正。

pigpig007

cegong 發表於 2014-11-2 16:37
好，開始煮嘞！首先中火白鑊燒玉米餅每邊大概兩分鍾。見有少少黃黃哋就好了。燒好放埋一邊備用。

正呀喂

fortunerfamily

师兄真食神啊，棒。。

BB29

我想食皇帝蟹又想食和牛

MadeInHongKong.

和牛超正
睇到都流口水