蟹棒蠔仔粥＆露筍雞絲蝦仁拼兩面黃煎麵

alexGTR · 發表於 2014-9-25 01:51:52

各位師兄好！

好耐冇出帖同大家分享D入廚樂，今日先同大家介紹個蟹棒蠔仔粥。

材料：
蠔仔一斤
蟹棒適量
雞柳少量
芹菜一棵
芫茜適量

調味料：
魚味濃湯寶一粒
薑幾片

做法：
先將蠔仔倒入大湯碗中，加少少水及將三至四湯匙之生粉加入撈勻，等大概五分鐘就可以開水喉，洗到D蠔仔白雪雪，當然要揀返D蠔殻碎出嚟啦！好嘞，去到呢度有冇唔明先？冇就繼續，煲滾水將所有洗好嘅蠔仔放入汆水備用，汆完D蠔仔又肥又鮮，不過未開始煮住，因為未有粥，而我就用咗個最容易嘅方法，先煮飯，再用煲仔煲水，水滾後加魚味濃湯寶同幾片薑就加埋D煮好嘅飯入去，煮多陣就得，如圖！

好啦！去度呢度就要煮埋D材料一齊，首先要將D醃咗嘅雞柳放入煮吓先，再將蠔仔加入，上面放預備好嘅蟹棒，跟住就可以放埋D芹菜粒入去，攪勻佢就可以上枱。

冇理由淨食粥咁寡，咁就要整返D炒粉麵送粥，咁就煎個脆到不得了嘅兩面黃去撈汁食！

材料：
蝦仁十幾隻
雞柳適量
露筍一包（切開三節）
蛋打散2隻
麵餅2個
九王少量切段

做法：
先將麵餠淥開，隔好水備用，跟手就要醃好蝦仁同雞柳，就要先用煎pan去煎一煎D麵，要小心D煎，唔可以太燶，否則燶咗搵你食，煎起用碟盛起個麵就可以上枱。

而家做埋個汁就可以開飯，先用個煎pan去爆咗D雞柳先再加埋D蝦仁落去，呢度要加清雞湯去煮，滾咗就可以放埋D露筍落去，跟手落埋D九王就可以加蛋汁入去，埋個玻璃芡就可以拎埋上枱開餐！

希望大家中意今日介紹嘅中國四大發明嘅其中兩種！

多謝觀看！