曼聯省番靚招牌

man36951 · 發表於 2014-9-14 11:37:26

6大新援盡出 20億身價強打QPR

如果連QPR都贏唔到，曼聯真係情何以堪？魔王尹戈爾接掌之初曾豪言目標係重奪英超冠軍，重拾王者霸氣，點知踢咗3場聯賽仲未開齋，真係瘀爆。今晚紅魔喺主場迎戰升班馬昆士柏流浪（QPR），3大貴價新兵法卡奧、戴利白蘭特同馬高斯盧祖會作處子上陣，加埋英超標王迪馬利亞，仲有安達靴里拉同勞基梳爾亦已傷愈候命，總值1.6億鎊（約20億港元）嘅6大新援悉數投入戰鬥，呢支史上昂最貴嘅紅魔誓要大勝一場，省番靚招牌。咪諗咁多，捧讓球主勝！

（now 621周日晚11時直播）

老虎出柙具震攝力

為咗取得首勝，曼聯可以去得幾盡？曼聯今夏大玩金錢足球，化身「鏝聯」一共花咗成1.6億鎊購入6大新兵，今晚均可悉數上陣，其中將會出任防中嘅戴利白蘭特同已經攞到工作證嘅後衞馬高斯盧祖將大大加強紅魔嘅防守能力，令球隊攻守更加平衡，而戴利白蘭特更係體能超強，能夠90分鐘滿場飛，有佢頂替又老又慢嘅費查，喺中場中路同傷愈復出嘅安達靴里拉拍住上，中場活力大增，同時亦減輕後防嘅壓力。

至於今場波嘅焦點梗係落喺「老虎」法卡奧身上。呢位鋒霸人見人怕，頭槌、左右腳射波、走位入楔、埋門觸覺都勁到爆，即使佢處子戰狀態未起、或者同隊友未夾熟，但只要佢企喺場上都已經起到震懾作用。另外「天使」迪馬利亞喺國際賽期踢曉飛，希望將良好狀態延續至英超，而朗尼、尹佩斯同桑馬達肯定已深深感受到依家隊內競爭空前激烈，今場唔搏都唔得啦！

QPR攻力英冠級數

好明顯QPR嘅級數比起史雲斯、新特蘭更低，能夠喺奧脫福成功攞分嘅機會係極低，QPR陣中有乜大牌球星，名氣最響嘅應數里奧費迪南，呢位前紅魔功勛名將離隊後首次倒戈，相信落到場會加二錢肉緊，奈何年事已高，加上QPR攻力只有英冠級數，正前鋒查理柯士甸上季踢英冠就勁，但嚟到英超就明顯唔夠班，而且球隊作客例牌腳軟，作客大敗熱刺0比4都算，喺英聯盃作客對住乙組仔伯頓都可以輸得就真係冇眼睇。

已無退路嘅曼聯今場不但要贏，而且仲要大勝一場，一於揀1.65倍嘅讓球主勝啦！

LUNG0011808 · 發表於 2014-9-14 12:56:31

主其它法卡奥入四球

kevinkac14 · 發表於 2014-9-14 13:19:18

今晚, 嘻嘻

Peter1235 · 發表於 2014-9-14 13:20:07

真係要睇下雲高爾用咩戰術同點用人
你睇下香川返到多蒙特, 完全被激活
雲佩斯同法卡奧都係埋門型前鋒, 完全撞曬
英超好多隊用傳統兩邊吊入, 用3-5-2有效對付兩邊攻勢嗎?
再加上曼聯d中堅敢全能? 可以踢到3中堅嗎?
去到中場仲慘情!! 靴里拉踢AMC好定MC呢? 費蘭尼又點用好呢? 佢都有用處!!
有兩位射手, 朗尼勢要做後上前鋒, 咁馬達又點擺好呢!?
仲有迪馬利亞, 咁邊個做ball-keeper!?
真係好難搞!!!!!!!!!!!!!