劉俐燒衣嗌暈 Ashina驚青趴街

超人Tiga · 發表於 2014-8-8 15:17:32

農曆七月是中國民間傳說的「鬼月」，愈近七月十四氣氛愈陰森，很多人都盡量避免行經猛鬼熱點，不過性感女模「藍莓」劉俐、「仙樂都」吳堯堯、王璐瑤（LuLu）、Ashina（郭奕芯）及「怪談女」Katie（許芯悅）卻大無畏組成「探靈旅行團」，日前深夜到出名猛鬼的西營盤高街鬼屋探險！

帶備兩把辟邪刀
身為中泰混血兒的仙樂都對靈異事件素有研究，為保安全，特地相約好友魯士金殿泰國通「幫拖」，帶齊金銀衣紙及食物「打招呼」，又帶同兩把辟邪刀以備不時之需，泰國通事前已吩咐注意事項，惟劉俐及曾與前亞視高層盛品儒傳緋聞的Ashina則大口氣聲稱冇有怕，結果兩人最終「賴嘢」！

眾女於燒衣前輪流分享靈異經歷，令現場瀰漫恐怖氣氛，其時劉俐已神不守舍雙目放空，當她與仙樂都燒衣時更感到不適，不停標汗及發冷，在逾三十度氣溫下要求披上外套，其後更不支暈倒，遂決定投降中途離場，並由LuLu攙扶離開。眼見好姊妹「中招」，眾女鬥志已減一半，但仍戰戰兢兢拿起辟邪刀及電筒入鬼屋完成探靈任務！

感覺身後涼浸浸
兜完一圈後未見異樣，但Ashina、Katie及LuLu已緊張得皺晒眉，最大膽的仙樂都則「唔夠喉」，提議自拍測試一下是否能「捕捉」靈體！自拍多張相後，離奇地發現相中Katie的位置果然朦了一片，Ashina此時突然崩潰大叫並拔足狂奔，身旁的三女被嚇親相繼狂跑，四女擘大個口儀態盡失，Ashina跑到門口時更不慎仆低，十分狼狽！

事後四女談起剛才經歷仍未回魂，Ashina更將紙巾貼上面遮樣，行為怪異，至於在《怪談》中出名冇膽的Katie面青青嗌頭痛。劉俐昨日受訪時表示心情仍未平復：「當時身後突有陣涼風，我覺得唔舒服，嗰晚都失眠瞓唔着，其實之前去完泰國返嚟已經覺得唔妥，我膚色一直白唔番，背脊仲愈嚟愈黑。」仙樂都雖然「經驗豐富」，但亦認為可能事出巧合，希望減低大家的驚嚇指數：「呢個經歷係幾驚，好多時係寧可信其有，但都唔排除有巧合成分，又可能係佢哋本身已經有唔舒服嘅。」