HR「no eye see」10大儀容衣著 (轉貼)

s1000 · 發表於 2014-6-22 09:51:31

搵工面試，說絕對「唔睇樣」是假的。HR與求職者會面，第一眼就是看外表，包括五官、儀容和衣著。五官無得執（除非有目的地飛一轉韓國之類，這是題外話），唯有儀容和衣著有得「掹」。以下特別精選10大HR「no eye see」儀容與衣著細節，求職者務必引以為戒。

10大HR「無眼睇」儀容衣著細節

　　1/ 鴛鴦襪

　　HR寸爆︰「著對似樣嘅襪都咁難，唔好話委以重任，就算係最基本嘅工作，我都無信心。」

　　2/ 「蝕底」鞋

　　HR寸爆︰「鞋可以反映一個人嘅性格。一個對自己同工作有要求嘅人，點會對鞋著到蝕晒都唔換？無錯，節儉係好事，但而家嚟見工，要求求職者著對好啲嘅鞋唔過分啫。」

　　3/ 卡通呔

　　HR寸爆︰「成熟啲好唔好？求職者嚟得見工，都有番咁上下大個人啦卦，打條卡通呔嚟，係咪真係咁好玩先？唔該啦。」

　　4/ 素顏

　　HR寸爆︰「天生麗質還天生麗質，求職者嚟得見工預咗見人，唔該都化個妝，精精神神、乾乾淨淨。清淡啲無所謂，令人舒服就得，但都唔好完全素顏，我對求職者無眼耳口鼻個樣無興趣。」

　　5/ 煙眼（Smoky eyes）

　　HR寸爆︰「日光日白油到對眼黑晒，驚驚！」

　　6/ 未剃鬚

　　HR寸爆︰「其實，嚟見工呢件事係咪咁唔值得尊重呢？見過有求職者滿面鬚根嚟見工，in個前線位，我問佢係咪好趕，佢話覺得咁樣不覊啲。真係唔知好嬲定好笑！」

　　7/ 大帆布袋

　　HR寸爆︰「見工呢，要誠意、要莊重，除非in啲創作位，否則一身沙灘裝加個大帆布袋，我會認為你去錯咗時空。」

　　8/ 鬆糕鞋

　　HR寸爆︰「鬆糕鞋呢啲，求職者著嚟見工，唔係嫌你娘，就係唔識欣賞你潮得滯囉！」

　　9/ 甩指甲油

　　HR寸爆︰「面試經常要請求職者簽名，一拎對手出嚟，唔係睇唔到呀嘛？唔係睇到都唔理呀嘛？好簡單，兩位求職者經驗同學歷相近，一個無搽指甲油，另一個有搽……但舊樓牆身剝落咁甩咗大半，揀邊個唔使問啦卦！」

　　10/ 個頭10世唔洗

　　HR寸爆︰「大佬，唔係請呀嘛？」