自家煮～芝士蕃茄焗豬扒飯，XO醬西芹雞柳炒花枝，冬菇瑤柱花膠螺頭烏雞湯

alexGTR · 發表於 2014-5-22 02:30:44

各位師兄好呀，又係我，今日又嚟家常便飯，我要同大家介紹嘅就係焗豬扒飯，西芹雞柳炒花枝片同埋煲咗個冬菇瑤柱花膠螺頭烏雞湯，我主力會講解個焗豬扒飯同個湯嘅做法。

芝士蕃茄焗豬扒飯

材料：
豬扒六至七塊
蕃茄一個切半再切片
洋蔥半個切絲
茄膏半罐
雞蛋兩隻
白飯三碗
芝士碎適量

做法：
先處理豬扒，用菜刀背挆到軟身，落調味料撈勻待入味備用。跟手要炒飯，預備蛋，發爛兩隻備用，滾油落蛋快炒，蛋未凝固前落飯炒至全部散開及乾身，可用少鹽調味，放碟上舖平備用，然後要炸豬扒，將炸好嘅豬扒放喺炒飯上面，由D肉汁滲入D炒飯度。

跟手要洗淨個鑊，因為要煮個汁，先開鑊，落蕃茄及洋蔥絲炒香，再落茄膏半罐，加糖及加水炒至糊狀，勿加太多水，好似蕃茄炒蛋嘅糊度就啱啱好，又再將茄汁鋪上豬扒面就可以落芝士碎，攪掂就可以入焗爐，焗大概四分鐘，芝士溶咗就食得！

XO醬西芹雞柳炒花枝片

材料：
西芹半棵
雞柳一塊
厚墨魚扒

做法：
先將西芹去根切段，雞扒切柳，墨魚扒切薄片備用，西芹先汆水撈起備用，將雞扒用調味料醃十分鐘就可以落鑊去炒，再落埋花枝片去炒，最後就倒埋D西芹落鑊加埋XO醬炒勻就可以上碟！快靚正嘅一個餸！

冬菇瑤柱花膠螺頭烏雞湯

材料：
冬菇八隻切一開二
瑤柱適量
花膠仔廿幾塊（用水發開到軟身）
中號螺頭四個（洗淨及切薄片）
烏雞一隻（斬頸去尾同腳唔要）
津白一棵切段約兩吋一刀
薑幾片

做法：
先將螺頭溶雪及用牙刷刷去污物，用刀將螺頭一開二，再將之切薄片備用（易於出味）。烏雞洗淨後一開二，用滾水氽走D血水先，跟手煲滾四分三煲水，先落烏雞，冬菇及瑤柱落煲去煲住先，因為呢幾樣材料要煲到出味，所以要煲先，跟手將發好咗嘅花膠及螺頭放入煲內，落津白及薑片，（落哂材料應該差唔多九成滿），所有材料入煲後等大滾就可以較返去中火，由佢慢慢煲，煲到D材料及湯淨返三分之二煲就落鹽調味，熄火！有湯飲！

見到D花膠同螺頭嗎？真材實料㗎！

俾多張全家福你哋睇！

大家襯熱，起筷啦！

希望大家中意及繼續支持廚版！