自家煮～家常便飯：煨雞麵，韮菜豬紅，黃金脆肉瓜

alexGTR · 發表於 2014-5-15 02:20:39

各位師兄好呀，好耐都冇出帖啦！今日同大家介紹返D家常小菜，有D喺出面食完，自己返去煮，味道起碼有八九成似，好處係食飽唔口乾，慳錢又健康。好嘞，要介紹吓今餐有乜嘢食先！

煨雞麵
韮菜豬紅
黃金脆肉瓜

首先要介紹～煨雞麵（四人份量）
材料：
雞扒2塊
上海幼麵一份（約斤四両）
芽菜仔三蚊
小棠菜半斤
芫茜一札

做法：
乜都未開始嘅時候要淥咗D上海幼麵先，再過冷河備用。

跟住將所有材洗淨備用，雞扒溶雪後要切柳，唔需要切太細，切碎哂好難揾，芫茜切碎備用。預備好材料後就要炒雞柳，先用蒜茸起鑊，再落雞柳快炒，見到開始轉色要加水，放粒雞味濃湯寶，之後落芫茜，再落上海麵，試味！唔夠味落鹽，糖，較到自己啱味，當然，要重味嘅可以加多個濃湯寶都得，最後試到啱哂味後就落埋小棠菜同芽菜一齊煨，煮到入哂味就可以熄火。攪掂一個！

第二個餸～韮菜豬紅
材料：
豬紅十蚊
韮菜一札
馬拉蝦米辣椒醬

做法
先將韮菜洗淨，切段備用，豬紅要過水過2－3次水，過到冇D血水出嚟就可以用兜浸住先，用蒜茸起鑊，落豬紅落去快兜幾下，（唔好煎，因為煎咗D豬紅會有瘀黑色，賣相唔好睇！）兜勻D蒜茸就快手落水去煮熟D豬紅，落雞粉，鹽，糖去調味，再落蝦米辣椒醬去煮。（如果唔用呢隻，落豆辨醬都得）跟住要將洗好嘅韮菜去煲仔，（唔用煲仔就將韮菜汆水，用碟或湯碗上）跟手要落埋D胡椒粉落去，煮完熄火就將韮菜同豬紅合而為一，煲仔上爐頭慶一陣就可以上枱！又攪掂一個！

最後一個～黃金脆肉瓜

材料：
脆肉瓜兩條
咸蛋黃兩隻
牛油適量（只有牛油先可以推到D咸蛋黃起泡，其他花生油，粟米油都唔得，因為推唔起！）

做法：
先將脆肉瓜洗淨，滾刀切開後煲水先汆熟備用。

咸蛋淨要個黃，唔要白，好多人會用刀或匙羮去整碎個黃！喺呢度我教你用一個辦法，放兩個黃落碗，包微波爐保鮮紙，入爐叮一分鐘，出嚟了一了散佢就用得！
好嘞，要用牛油爆香D蒜茸開鑊，（點解樣樣都用蒜茸㗎？冇計，老虎中意，冇得揀！）跟手較中火，落咸蛋黃去推開佢，推到起泡咁，就可以落埋D脆肉瓜落鑊，一路炒，炒到乾身就得，呢個淨用咸蛋黃就夠，其他調味料都唔駛落！炒完上碟開飯！

好嘞，煮完都要俾張全家福你哋睇吓先，襯熱起筷！食得開心D啦！

食呢個煨雞麵，點可以唔落D配菜呢，呢個配菜係⋯⋯XO醬勁辣炒菜莆！配煨雞麵真係好味！

順手俾多張我廚房個調味架你哋汰，我手痕影㗎！

多謝收看及繼續支持廚版！