自家煮－雪菜火鴨絲炆米，西芹炒龍躉球，韮杞豬潤肉片湯

alexGTR · 發表於 2014-5-4 12:43:35

各位師兄好呀，開飯啦！
成個星期都冇煮飯，返夜又收得夜，冇計！言歸正傳，今次介紹個雪菜火鴨絲炆米，西芹炒龍躉球同韮杞豬潤肉片湯，希望大家中意！

先嚟個雪菜火鴨絲炆米先！

材料：
燒鴨四分一隻，要下莊最好！（起骨切絲）
雪菜少量
韮王少量
芽菜少量
米粉三個（可以用大包果D排粉去整，更有口感）

做法：
先將燒鴨起骨，要淨肉，然後切絲，切哂就啱啱好，將雪菜用水先浸一浸去咸味，因為雪菜果D都咸，要用清水去浸淡佢，然後切粒備用。韮王要洗淨，切段，大約兩吋長備用，芽菜亦要洗淨備用。

跟住要煲滾一煲水，落米粉淥到散開，就要撈起落筲箕，用煲蓋蓋上去焗，等D餘溫去焗熟D米粉，炒起時亦唔會碎哂。

然後要開鑊，將火鴨絲，雪菜，韮王等材料落鑊炒勻，再落芽菜同米粉炒，炒開後就要落雞粉同老抽調味同較色加少量嘅水去炒，炒起後可以上碟！完成第一樣！

第二味餸，西芹草菇炒龍躉球

材料：
龍躉魚肉切片半斤（以下叫魚）
韮王少量
西芹半棵
草菇少量

做法：
先將所有材料預備好，例如西芹去根，草菇開邊，魚要用胡椒粉，鹽，糖同廚酒醃好備用。

首先將魚落鑊煎一煎先，（最好用易潔鑊煎，煎出嚟靚D），跟住要將西芹同草菇汆水，汆好水就可以落鑊去炒，炒到咁上下就可以落埋D魚去炒勻，落味我用鮑魚汁同豉油就夠。（要辣嘅可以用XO醬），最後落埋D韮王炒多幾下又可以上碟，又攪掂一個！

好嘞！整埋個湯先！韮杞豬潤肉片湯。

材料：
韮杞一札
豬潤五蚊
草菇少量
瘦肉十五蚊

做法：
先將韮杞嘅葉全部整出嚟，點整？當然唔係逐塊搣！只要喺尾部用手指夾住，一路推去根部就會全部甩哂，好方便！瘦肉同豬潤用醃肉嘅調味料去醃，醃緊嘅時候就要煲水去整湯，水滾就用另一個爐開鑊，將豬潤同肉片炒一炒，然後就放入滾水之中，加埋D草菇，最後落埋D韮杞，落埋調味就可以上枱開飯！
貼士：D肉類炒一炒先滾湯，D肉冇咁嚡，同個湯會好飲D！

仲有個紫蘇雞翼冇介紹，因為呢個係外面買返嚟煎返熱上枱，所以冇得介紹點整，俾個全家幅大家睇先！