越爆越多：莫帥連青年軍訓練都改埋

Kick Off · 發表於 2014-4-25 19:41:03

根據曼徹斯特晚報消息，指有一件事大家都無留意，原來莫帥由根本開始想改變曼聯的打法，而開刀嘅就係青年軍的訓練。以前曼聯青年軍以用波為訓練的重點，不過今年已經喺莫帥手上變成一班以操體能為先嘅小朋友，呢個轉變仲令一班爵爺的舊部不知所措。

成個曼聯的青訓制度要由1986年睇起，當年曼城在青年足總盃比賽擊敗曼聯，而爵爺就睇得出呢個地方有好多高潛質的青年。於是，佢一入主曼聯第一件事，就係引入 Les Kershaw 去帶領球探團，亦做好青訓的工作，以訓練小朋友為主要目的。而佢哋嘅教育方針正正就係培育「小魔」，佢哋訓練嘅精神面貌同大紅魔嘅如出一轍，簡單啲講就係教「紅魔style」，等佢哋一成年已經可以加入一隊、做到無縫交接，教嘅都係一隊要用得到嘅腳法同技巧。而第一代的成功產物，正正就係傳奇中嘅傳奇、曼聯92黃金一代，亦即我哋叫開嘅「七小福」。

去到2001年情況又再轉變，梅倫史甸引入「荷蘭模式」，設計4打4的小型足球，把球場大細縮小，在逼住短兵相接的情況之下，施丹轉身、告魯夫轉身等等高度技巧變成訓練主菜，而全由技術高低決定勝負的比賽令小朋友們腳法越來越好。之所以唔想用11打11個的訓練，係因為咁就會變成體能主導，年長、身材高大的球員會較優勝，但長遠而言單靠體能不可能取得穩定的成功。

然而在莫帥的領軍之下，一切反回舊路，青訓回到重視體能的一套，一班習慣了爵爺模式的青訓人員甚至非常困擾，有諗過要辭職返屋企。講到呢到，再一次證明莫帥一套實在唔啱曼聯用。