自家煮－可樂炆德國鹹豬手

alexGTR · 發表於 2014-4-23 02:12:56

各位師兄好呀！開飯啦！

今日想同大家介紹一個幾特別嘅餸，叫做可樂炆德國咸豬手，禾諗可樂除咗炆雞翼外，炆咸豬手都係一個新嘗試，好嘞！介紹材料先！

材料：
急凍咸豬手一隻
可樂兩罐
小棠菜幾棵

配料：
薑幾片
葱幾條切段
雞粉少量
麻油少量

做法：
先將咸豬手解凍，用一煲滾水落薑葱去汆熟咸豬手，烚大概十五分鐘後撈起瀝乾，撈起後D水要完全瀝到乾透。因為仲要回鑊炸，呢兩個步驟太多嘢要兼顧，同埋隻咸豬手都幾大隻，所以冇影相，請勿見怪！當走油時要盡量要炸到隻咸豬手金黃色，燶少少都唔緊要，因為炸完都要再回鑊用可樂去炆，呢個步驟係要係要將個皮炸至鬆化。

跟著個步驟就要回鑊，將隻豬手原隻回鑊（驚唔入味就先劃一刀），豬手落鑊後就先落一罐可樂去炆，當一路炆緊嘅時候，D可樂會越嚟越少，到時就要開中火，將另一罐可樂加入，蓋上蓋繼續炇，記住將豬手反轉，每邊都有機會炆到，炆緊豬手其間要煲開一煲滾水去淥菜，落少少油同少少雞粉去吊味，淥好後將菜一開二，排好喺碟邊備用，好嘞，夠時間睇吓隻豬手炆好未，呢個時候應該都炆咗起碼45分鐘，用筷子督吓隻豬手淋未，好容易插得入就代表攪掂，落埋少少麻油就可以上碟，最後倒返D汁落去隻咸豬手度就可以開飯！

記得攞對刀叉去上枱切開佢分享！咪獨食呀！

希望大家中意及支持廚版！

多謝觀看！