自家煮-彩鳳翠花枝

alexGTR · 發表於 2014-4-17 16:04:50

各位師兄好！又開飯啦！

今日又同大家介紹一個去飲宴成日都食到嘅熱葷，個名叫彩鳳翠花枝，究竟點整？喺屋企可唔可以整到呢？答案係得嘅！各位跟住做，屋企做節或大宴親朋果陣整呢個餸出嚟食，一定讚不絶口！

先睇吓有乜材料先！

材料：
墨魚扒一塊（新鮮或雪藏貨都得）
雞扒一件
西芹半棵
青紅甜椒各一隻（切細件）

調味料：
雞粉適量
鮑魚汁適量
瑤柱絲適量
老抽少量（較色用）

做法：

西芹：
先將西芹洗淨，去根，因為唔去根一定會食到成口渣，未食到其他已經扣哂分！然後要切條，濶度約半吋，（由頭到尾直切一開二），長度每條為大約二到三吋左右就得。記得先汆水，一陣炒嘅時間會快D！

雞柳：
雞柳溶雪後切成一舊舊，用醃肉嘅調味料醃，記得加生粉，否則雞柳會嚡口。

花枝：
將原塊墨魚扒用刀將面頭嘅衣清走，即係紫色果層皮，清好之後要㩒吓有冇硬嘅位置，如翼位與墨魚肉嘅接囗位，有就要用刀片走！清理好就成塊墨魚扒切薄片，記住要斜刀片落去，刀要利，否則好易割到手！花枝切好後都要落少少鹽同胡椒粉適量去調味。

跟著住要用蒜茸開鑊，爆香蒜茸後就要落雞柳，炒到轉色就要落埋花枝片去炒，跟手可以落埋青紅甜椒同已經汆水嘅西芹落鑊兜勻，炒一陣就要落瑤柱絲，鮑魚汁等調味，炒勻落多二茶匙老抽較色，炒勻D老抽就可以上碟開飯！

各位襯熱起筷！
希望大家中意呢個彩鳳翠花枝

多謝觀看及支持廚版！