自家制-雜錦咸湯丸&蒜片燒汁牛柳粒（慎入，好多圖！）

alexGTR · 發表於 2014-4-11 01:39:10

各位師兄好！開飯啦！

今日放假，可以諗下又有乜可以煮，好！反正都煮，今日介紹個又可以玩又可以食嘅餸俾大家，嚴格嚟講唔可以叫餸，真係有湯嘅丸！另外，仲有4A牛整嘅牛柳粒！等住流口水啦！哈哈！

首先介紹個咸湯丸先，其實好多人以為湯丸係過年先食，其實唔係，計我話：中意煮就煮，食得開心D！

材料：
瘦肉切丁
紹菜半棵
蝦仁適量
蜆肉適量
帶子肉適量
瘦臘腸一條
冬菇絲適量
蝦乾適量
菜莆適量

湯丸材料：
糯米粉一包
暖水適量

湯丸（粉團做法：）
先將糯米粉倒入鐵盆，慢慢加入暖水，不停將粉加水去搓到變粉團，直到搓到粉團唔痴手為準，水勿過多，否則搓唔到湯丸唔好瀨我！搓好粉團後，要將粉團逐少逐少咁搓成手指頭大細，預備一至兩隻瓦碟，用一層薄生粉鋪平，然後放搓好咗嘅小粉團喺上面備用！

材料做法：
先將已經醃好嘅瘦肉落鑊，再依次序落埋其他材料（如圖），最後落埋紹菜就可以加水，等佢滾起後就放粒豬骨濃湯寶，之後乜都唔駛理！蓋上蓋等滾起就放多一拃蝦乾落鑊，滾多滾就可以落湯丸！因為呢個粉團我俾2個小妹妹自由發揮，所以會有D其他形狀嘅湯丸，好似星星，心型，三角型，波板糖型同圓型！係咪好得意呢？

好嘞，嚟到呢度都估到要落湯丸，俾個貼士大家，唔好諗住用手就可以將碟上面嘅湯面放到去鑊度，其實係會散㗎！咁你要預備一支牙簽，剔D湯丸落去，快，靚，正！落哂湯丸就係等，等到D湯丸浮起哂就得啦！攪掂！最後一幅圖係咪好正呢？

⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯

好嘞！要介紹埋今晚另一個主角，蒜片燒汁牛柳粒！

材料：
A4牛兩塊

調味料
燒汁4湯匙
喼汁1湯匙
雞粉少量
威士忌適量

首先將A4牛肉處理好，切粒！大概一吋丁方一粒，一口就啪得入口就得！呢個唔駛醃，因為靚牛肉醃咗就食唔出牛肉嘅鮮味，切好就開鑊，先落蒜片，後落牛粒，記住唔好煎太熟，見到四面開始轉色要剷起，（你哋可以見到碟牛粒仲有少少肉汁流緊出嚟！）因為個煎pan細，所以分2轉煎，煎起後要預備威士忌一枝，同埋要用碗仔較好個汁備用，呢兩樣嘢要分開落，先落酒玩火先，玩完火就落埋個汁兜勻佢就可以上碟，記住落返少少芝麻，香好多㗎！