當海鮮遇上白粥時⋯⋯

alexGTR · 發表於 2014-4-2 00:59:37

各位師兄好呀！呢排又濕又熱，攪到冇乜胃口，所以今日同大家介紹個雜錦海鮮粥同兩款炒麵，希望大家中意！先講材料：

材料：
新鮮鮑魚仔一斤
三點蟹半斤
圍蝦半斤

做法：
要食粥當然要煲粥，但今次係煲海鮮粥，所以要將所有海鮮洗淨，蟹要劏好斬件，鲍魚刷淨，去入臓同去殻，全部準備好就可以煲水，煲滾水後要落少少雞粉，鹽同糖調味，之後要將所有海鮮倒入滾水汆熟，大約七成就夠，要撈起！因為D海鮮仲要落返粥度煮，大熟唔好食！（海鮮用乜都得，但請勿用瀨尿蝦，因為有機會食完皮膚敏感出疹！）

之後洗淨D米，要用大湯碗浸開D米，浸好就加少少油去攪吓佢，因為加咗油，D米冇咁易燶底！呢個時候要將D浸好嘅米放落去D海鮮湯度！（呢個海鮮粥係一個煮嘢食好叻嘅廚房師傅教嘅！）當然，剛落米去個煲度要用大火，攪吓佢先！唔好唔記得放隻瓦匙羮落去煲，因為落咗真係唔會燶！等到D粥煲好嘅時候，你會見到D米花已經爆開晒，就可以放返D已經汆咗水嘅海鮮返落去，較返大D個火等佢又再滾返起嘅時候，攞返走隻匙羮，個海鮮粥咁就差唔多完成嘞！

（記住，煲海鮮粥唔係將海鮮放落粥度，由頭煲到尾，呢個做法會完全浪費咗D海鮮，因為到你食嘅時候，海鮮煮得太耐已經全部霉哂，D蟹殼完全軟哂，唔好食，嘥咗D海鮮！）

最後，喜歡加多D配料嘅師兄可以喺食之前，預備好D大頭菜粒，葱粒同生菜絲，放哂D配料落碗先放粥，呢個係海鮮粥以外又一美味！

⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯····

另外，介紹多2個送粥嘅炒粉麵俾大家，係干炒牛河同雞絲炒油麵，點樣炒？其實都差唔多做法，先講干炒牛河：

材料：
牛肉二十蚊
河粉八蚊
芽菜少量
蔥段少量

牛肉同雞絲落鑊前都要醃，用生粉，雞粉，糖，廚酒，豉油同少少水去醃，切忌牛肉勿落鹽，否則柴皮搵你食！

做法：
先落油起鑊，爆牛肉，炒到牛肉開始轉色就落河粉，用筷子同鑊剷炒勻，落雞粉同糖較味，最後落埋芽菜同蔥段，用老抽較色，兜多兩嘢就可以上碟！

雞絲炒油麵

材料：
雞扒切絲
油麵一磅
芽菜絲適量

做法：
熱油起鑊，下雞絲爆炒，七成熟再落油麵落鑊炒勻，最後落埋芽菜同調味料調味，老抽較色！炒法同干炒牛河差唔多，但炒粉麵要筷子同鑊剷同時炒，否則好易會炒到D粉麵斷哂就唔靚！

送多張全家幅俾大家！

希望大家中意！
多謝觀看！