花鵰蒸蟹

alexGTR · 發表於 2014-3-13 02:24:59

開飯啦！

各位師兄好呀，繼上次玩完火之後，今次再介紹多一個用酒整嘅餸俾大家，今日喺街市見到D蟹幾靚，又大隻，又有膏，咁買兩隻就整花鵰蒸蟹啦，（有D加埋雞油㖭呀），呢個餸其實唔難整，係要劏蟹麻煩D啫！首先要睇睇有乜要預備先！

材料：
花蟹或三點蟹兩隻
蛋三至四隻，視乎蟹嘅大小
清雞湯一碗
花鵰酒半碗（酒嘅份量隨個人口味增減）
糖，鹽少量

（睇吓個火機就知隻蟹有幾大隻）

做法：
先劏蟹，蟹蓋去肺及蟹咀，蟹身喺中間位置切開，切開后再對開兩舊，即一開四，全部切好後排好喺碟度，放入去個鑊度之前，先將一半嘅花鵰酒倒上D蟹度先，等D蟹吸收吓D酒香先！

跟住水滾就落鑊蒸，大概蒸五至六分鐘就要攞返出嚟！（喂！老友！花鵰蒸蟹唔喺淨蒸蟹㗎喎！）好嘞，而家要講埋下半部分要做D乜！首先，你要將D蛋發爛先，另外加同等份量嘅清雞湯落去，跟住就係頭先剩返果D酒都倒埋入去，咁樣D蟹攞咗出嚟做乜呢？有冇發現蒸魚，你蒸起出嚟時都會有D水（呢D水就係D魚嘅精華），不過我都會倒咗佢，因為要淋豉油，熟油！蒸蟹呢D蟹汁都係倒！不過係倒入D蛋度，因為鮮味就要加埋呢D“精華”落去，成個餸就有咗靈魂嘞！然後將蛋漿，蟹汁及所有材料發勻（喜歡食蔥粒嘅，可以喺呢個時候放入！）跟手就倒返落去D蟹度，記住包保鮮紙！（否則，蒸完出嚟唔靚就咪搵我！）跟住放返落鑊蒸多十分鐘就可以拆保鮮紙上枱開飯！

希望呢個又香又滑嘅花鵰蒸蟹大家會中意！
大家襯熱起筷，勿客氣！

多謝支持及觀看！