財爺孤寒竟減甜借庫救急靠觀音

法宏 · 發表於 2014-2-25 06:08:34

警方宣布一系列特別交通及人群安全管理措施，呢條街又話封路，嗰條街又話改道，究竟搞乜鬼呢？哦，原來係一年一度觀音開庫，警方因應情況方便善男信女前往觀音廟求神上香。
每年農曆正月二十六日係觀音借庫嘅大日子，今年開庫日期係陽曆二月二十五日。由於每逢觀音借庫，廟宇例必人山人海，所以除咗警方有必要封路之外，部分廟宇都規定只可以帶三支細香，而且必須喺廟外指定區域點香。

觀音借庫嘅習俗係如何而來嘅呢？傳說喎，老天爺為咗考驗觀音大士，派咗五百個羅漢下凡，幻化成僧人向觀音討糧。觀音見到咁嘅情況馬上大發慈心，開倉庫提供齋菜畀五百個僧人果腹。呢一日係正月二十六日，觀音借庫嘅習俗自此流傳。

今年兩間熱門開庫嘅廟宇包括大坑蓮花宮以及筲箕灣天后廟，兩間廟都將借庫金額加碼，由去年最多八億增至十億元，而每逢開庫日大排長龍嘅紅磡觀音廟，今年借庫金額維持三千萬至十億元。大家千祈要記住喎，借咗要還，否則唔靈。

功夫茶因乜事幹大費周章講咁多觀音借庫呢？無他嘅，財爺唔肯還富於民吖嘛，惟有依靠觀音借庫囉。

財政司司長曾俊華出晒名係孤寒財主，守財奴性格歷久不衰，由前朝貪曾政府一直延續到現屆梁朝。啱啱遇着剛剛，最新一份財政預算案嘅發表日期係二月二十六日，即係觀音借庫嘅翌日，善男信女自求多福，梗係湧去觀音廟祈求超自然力量保佑，點都好過望財爺打救。

鬍鬚曾一早就對外放出風聲，事先張揚新一份財政預算案會減甜，派糖措施縮水。減甜措施包括不再提供原本家家戶戶有份嘅一千八百元電費補貼，公屋免租由去年兩個月減至一個月，差餉寬免亦由四季減為兩季，上限維持一千五百元。維持不變嘅可能係，綜援同俗稱生果金嘅長者高齡津貼仍會出雙糧。至於中產階級最關注嘅薪俸稅退稅安排，聽講政府傾向盡量維持去年水平，利得稅退稅都會維持，另外將供養父母免稅額輕微上調。

你知啦，香港庫房唔係冇錢，只不過因為曾俊華一味撳住個荷包做官，小市民先至冇辦法好似澳門咁得到一次又一次嘅派錢福利。屬於激進民主派嘅人民力量警告呀，若然預算案唔向港人同胞每人派發一萬元，將會以拉布方式阻撓撥款申請。

既然財爺孤寒成性，如果閣下手頭好緊需要江湖救急，功夫茶建議你走去觀音廟湊熱鬧，借來十億八億，話唔定命運從此改寫。