糯米釀蜜糖雞翼

alexGTR · 發表於 2014-1-22 01:19:16

本帖最後由 alexGTR 於 2014-1-22 01:46 編輯

各位師兄，大家好！今日食D乜？諗唔到？放假有時間可以試吓好似我咁，整吓D手作仔，包你屋企D老人家同小朋友食到津津有味嘅⋯⋯糯米釀蜜糖雞翼。

材料：
雞全翼十隻
糯米飯一盒（超市有售）

調味料：
雞粉，鹽，糖，廚酒，生粉，少量水（用碗仔撈好及入焗爐前搽上雞翼面），蜜糖（先焗十五分鐘搽蜜糖上面再焗十五分鐘）

做法：
先將雞全翼之雞鎚切去，雞鎚可斬件用金針雲耳蒸咗佢又多一個餸，先用較剪小心於雞中翼之頂部剪開雞軟骨與雞肉相連之部分，之後用手向下推，此動作可令雞骨露出。當雞骨完全露出後小心攞走，唔好整穿雞皮備用。如圖：

跟住要搵鐵匙羮一隻，將糯米飯釀入雞中翼內，釀好嘅雞中翼要用牙簽封口並排於焗爐之鋁盤中。如圖

最後就要落味，將調味料搽於雞翼上（點解唔醃咗D雞翼先釀？因為醃咗會釀唔到糯米飯入去，D飯會跣返出嚟！），再放入已預熱之焗爐，一百八十度先焗十五分鐘，拉盤雞翼出嚟搽蜜糖，再焗十五分鐘，拆牙簽上碟完成！

今次有D美中不足，就係冇加半茶匙老抽入調味料幫助上色，所以D雞翼唔夠色，各位師兄整嘅時候切勿忘記。
多謝觀看及支持！