團年菜－紅燒海皇翅（素翅）

alexGTR · 發表於 2013-12-31 02:45:08

本帖最後由 alexGTR 於 2013-12-31 13:33 編輯

各位師兄好，今日我為大家分享一個翅羮⋯⋯紅燒海皇翅，希望大家可以喺團年飯時做俾家人食，個個食完開開心心過年！

材料：
魚唇一包(汆水切絲）
鮑汁螺片一罐（切絲，留汁備用）
雞扒兩塊（汆熟拆絲備用）
帶子及蝦仁（視乎人數而定）
素翅或魚翅適量
冬菇10粒（切絲備用）
竹苼8－10條（浸水洗淨，切圈備用）

以上材料為7－8人份量。

做法：
煲一鑊水，冇錯，我用鑊去推翅嘅，用煲都得，但用煲會比較易燶底，因為個湯殼唔會個個位都去到！首先要將雞絲，冬菇絲同竹苼落鑊，雞絲滾散及冬菇絲出味，竹苼就吸收D味先，落一個雞味濃湯寶調味（清雞湯亦可），因為仲有鮑汁，唔駛落太濃味住。之後再將海鮮及素翅（或魚翅）放埋落鑊，等佢滾起就可以落埋D鮑汁及加鹽同糖調味，跟住就是勾芡，呢度要講清楚少少，份量係，用一個大湯碗嘅生粉開半湯碗水喉水，用手指攪溶D生粉佢，最後會成生粉漿，就可以預備推芡。

當所有材料大滾時，將D生粉漿慢慢倒落D湯度，其間要不停用湯殼攪拌，直到個湯變成羮，濃度為街邊碗仔翅為準，如推好後有多餘的粉漿都唔好再落（太杰好難食）反之，未夠身就要再開多D粉漿再推啦，推好芡之後要用老抽較色（推好芡後較色會比較易控制！），（顏色深淺如圖）最後上枱前要試味，應該味道鮮美，家人會讚不絶口！

希望各位師兄中意呢個紅燒海皇翅！個個食過來年行好運！

多謝觀看！