籠仔荷葉蒜茸蒸蝦（炒飯底）

alexGTR · 發表於 2013-12-24 01:22:37

本帖最後由 alexGTR 於 2013-12-24 01:36 編輯

各位師兄好，跟據上一個帖得知大部分師兄中意食臘腸同荷葉飯，咁就出一個同荷葉飯有關嘅餸俾大家！都係果句，整得唔好，唔好插咁大力。多謝！

首先預備材料及工具：
荷葉二塊及蒸籠一個
主角⋯⋯中蝦一斤，開邊備用。
配角⋯⋯臘腸一條（切粒），菜粒適量，蛋二隻（打散），冷飯二至三碗。
配料⋯⋯蒜茸一飯碗，指天掓一至二隻切碎，蔥花，金蒜適量。

首先炒飯，用滾油開鑊，先落蛋再加飯炒到D冷飯散開，後落臘腸及菜粒，少鹽調味，唔駛落雞粉！因為唔係淨食炒飯，到最後就知道D精華喺哂D飯度！炒起後用碟盛起備用。

跟住就要淥荷葉，呢個就係先炒飯嘅原因，因為荷葉喺汆水時會有D深綠色嘅色素滲出，再炒飯就會有青臭味喺D飯度，然後將荷葉跟籠仔大小裁剪。當墊好荷葉後，可以將炒飯放於荷葉上備用。

再跟住就要洗乾淨隻鑊，可以用多少少油去開鑊爆蒜茸，指天椒粒同蔥花，同時間要落少少糖同雞粉調味，完成後用湯碗盛起備用。

跟住就要將D開咗邊嘅蝦鋪哂喺D炒飯面，然後用炒起咗嘅辣椒蒜茸同油及金蒜（金蒜唔駛炒）鋪喺D蝦上面，如圖。（最好用剩咗嘅荷葉裁返個圓形蓋返喺面先蓋上竹籠蓋）

去到呢個步驟，唔講都知道要開始煲滾水落鑊蒸蝦，原隻籠仔放入個鑊度蒸八至十分鐘，如圖。

蒸起後就可以上枱，D飯吸收哂D蒜茸蒸蝦嘅精華，呢啖飯真係難以忘懷！

各位隨便起筷，唔好客氣！
希望各位師兄中意！多多支持！