英超八家争鳴

man36951 · 發表於 2013-11-13 00:25:29

八家爭鳴

再講Big4就Out喇，依家正式踏入8家爭鳴時代，試想像近十年八載聽過最勁嘅Terms都係意甲七雄，但英超打咗接近三份一賽程，頭8隊竟然只有最多6分差距，實力接近到離晒譜，你話幾浮誇，但對於球迷嚟講，咁樣反而睇得仲過癮。

阿仙奴無債一身輕

用肥媽成名作爭氣去形容阿仙奴就最貼切，大家記唔記得《新報波經》開季前走訪咗英國，當時我哋都俾酋長球場嘅宏偉程度嚇親，依家佢哋還完債，唔使賣球星，更斥巨資購入奧斯爾，一個箭步就化身爭標大熱，咪忘記佢哋仲好多傷兵，「夫添」肯定仲勁，唔通真係無債一身輕？
「阿仙奴N年冇冠」已經係一個街知巷聞嘅貶詞，不過呢句說話反而幫咗槍手減壓，亦令到佢哋知恥近乎勇，一度締造出各項賽事9場作客不敗，兼且連續10輪英超有波入，已經係最佳嘅證明，幾乎係全隊唯一健康嘅箭頭基奧特交足功課，奧斯爾喺英超亦確實有超班之感，但最估你唔到都係艾朗藍斯大爆發，以前佢入親波都有名人死，依家佢入波多到啲名人都死唔切。
褲頭鬆動，領隊雲格已經密謀喺轉會窗重開後再增兵，雖然佢心儀嘅蘇亞雷斯同埋洛蘭迪未必斟得郁，但係有錢喺手，點都可以搵到強援加盟，何況以普多斯基為首嘅一眾星級十字軍正在康復中，遲吓又多一班人用，阿仙奴變相更上一層樓，要破N年冇冠宿命係最佳時候。

莫耶斯成紅魔死穴

費格遜可能搵齊麥玲玲同蘇民峰睇相都唔定，否則又點會走得咁合時宜先？雖然大家喪鬧曼聯夏季增兵慢半拍，但你都不得不承認，呢支英超衛冕冠軍基本上保留原班人馬，無論曼迷鍾唔鍾意，加入費蘭尼都係Bonas，實力理應有增無減，但點解依家只係排聯賽榜第5位咁狼狽呢？
做人同踢波一樣，你保留班底啫，但你啲對手增強咗實力，原地踏步咪變咗退步囉，而且新帥莫耶斯個人魅力唔夠亦係事實，加上佢都唔係一個扯線公仔，季初大膽棄用香川真司嗰陣，已經強烈表達咗呢個訊息，不過事與願違，莫耶斯現階段都係同失敗兩個字掛勾。
新帥冇料已經弊，最慘新援都冇貨交吖嘛，費蘭尼踢唔番愛華頓時代嘅貢獻，但起碼肯搶吓波，衰得過新星韋費特沙夏，呢個小朋友連出場機會都冇，仲吹緊話明年1月會被借走，咁即係話兩位新援都得物無所用，即使發掘出另一位天才贊奴沙，但要靠佢嚟爭冠始終不設實際，講嚟講去都係要靠朗尼同埋尹佩斯呢對拍擋，簡單直接四個字形容曼聯，咪新不如舊囉！

修咸頓締黃金一代

每季英超梗有啲球隊失驚無神殺上前列，然後又消失得無影無踪，不過今季嘅修咸頓真係有啲唔同，佢哋失波全英超最少，輸波亦少過曼市雙雄同倫敦列強，依家仲幫英格蘭不斷提供新血，繼拿鐵斯年代後呢隊修咸頓都算最經典。
本土戰士劃出彩虹係修咸頓掘起之道，列基林拔大器晚成已經夠晒傳奇，點估到同佢爭入英格蘭世界盃決賽周大軍嘅會喺隊友積洛迪古斯，一向好波但低調嘅隊長拉爾拉拿亦喺近期獲鶴臣賞識，依家連舒尼達連都話會跳船棄法國做三獅兵團成員，須知道修咸頓近20年最叻都係打造出一個拿鐵斯，就算唔計勞基梳爾呢啲新秀，球隊仍一口氣泡製出幾個英格蘭本土球星，你話呢份成功點算偶然，抵佢哋進駐英超前三。

利物浦靠「2S」復興

若要生活好，莫買利物浦！呢句「成語」已經唔啱用喇，因為「2S」組合蘇亞雷斯同埋史杜列治合拍度冠絕英超其他射手，估唔到領隊羅渣士嘅復興計劃會咁早見成效，下屆歐聯預埋佢哋都得喇！
英超成立之後，冠軍兩個字同利物浦冇任何關連，對紅軍嚟講，攞歐聯真係易過捧英超，不過羅渣士冇放棄到，肯用新人引援亦見眼光獨到，買斷史杜列治就夠晒絕啦！另外菲臘比古天奴天才橫溢，利記嘅實力到依家都未見底。
冇歐洲賽後顧之憂係利物浦搗亂英超嘅最強優勢，但後備板凳唔夠深就有啲隱憂，畢竟路爾斯阿拔圖、佐敦軒達臣、史達寧，甚至重創唞緊嘅伊亞高艾斯巴斯喺級數上仲差啲，主力有乜頭暈身慶，就會直接影響戰績，所以用前四做目標實際啲。

車路士衰在多人用

阿巴莫域治入主車路士咁耐，今屆可以話喺最多球星嘅一屆，試想像單係中場指揮官都有夏薩特、桑馬達、奧斯卡杜斯山度士同韋利安任你揀，可唔可以捧盃就睇下摩連奴嘅造化喇。
坦白講，今季車仔開局係油王入主後最差，但搞成咁反而係因為太多選擇，摩連奴都公開講過好對唔住球員，皆因啲人多到佢都唔識揀好，艾辛冇位入歐聯名單已經夠晒痴線，幾時執到個最佳11人出嚟，將會係車仔重奪英超冠軍關鍵。
伊度奧、丹巴巴亞同埋費蘭度托利斯孭唔起入球重任係藍戰士暫列第4嘅主因，有傳摩連奴會趁比利時友賽哥倫比亞時臨場觀察法卡奧表現，準備明年1月出手入貨，如果連前鋒一環都搞得掂，車路士計班底喺英超可謂一枝獨秀。

愛華頓列強攔路虎

坦白講，愛華頓就唔係奪冠材料，不過呢粒拖肥糖勝在實而不華，名牌球隊撞正佢哋都好頭痕，冠軍唔關佢哋事，但要捧盃點都要問過佢哋，作為今屆最後一隊被破不敗身嘅球隊，最強攔路虎並唔係浪得虛名。
自強不息係愛華頓嘅寫照，領隊馬天尼斯想證明自己實力，盧卡古又想威俾摩連奴睇，被譽為新謝拉特嘅巴克里當然亦想扶搖直上，你可以話拖肥糖班球員各有所圖，但正正係呢份動力，令到球隊每季都位列上游。愛華頓係去到10月上旬作客曼城先至被破英超不敗身，列強晨早都輸晒，但拖肥糖竟然捱到咁耐，而且呢場亦係佢哋到目前為止唯一敗仗，同修咸頓一樣係英超輸波最少球隊，嗰種佢贏你唔到，但都唔俾你贏嘅特質，真係隊隊買佢怕。

曼城客場唔掂冇乎

又一次證明錢唔係萬能，你睇下尼格度、祖維迪、捷西斯拿華斯同埋費蘭甸奴個個都用天價加盟，坦白講又唔係打得唔好，可惜作客例牌腳軟同埋後防好似紙紮咁弱，依家排8咋陰公。
前面好似新援尼格度同埋舊人阿古路已經做好晒本份架喇，冇咗佢哋曼城仲大鑊呀，無奈一向穩陣嘅赫特好似撞邪咁，啲低級錯誤由季初開始未停過，領隊柏歷堅尼嬲嬲哋用彭迪利蒙取代埋佢嘅正選門將位置，可惜仲係太遲。
今季英超打咗11場，曼城已經輸咗4場，除咗對車路士係兩強相遇之外，另外輸嗰3場竟然係對卡迪夫城、阿士東維拉同埋新特蘭，仲要全部作客，唔通班球星淨係識喺主場踢波？柏歷堅尼再唔改善後防同作客問題，曼城絕對係咁先。

熱刺球隊政策出事

用經濟角度嚟講，熱刺賣加里夫巴利真係輸晒，一來佢哋一毫子都冇留低，係咁買人返嚟以為幾個頂一個冇死，點知班新援冇個可以獨當一面，難怪依家只能混喺英超第7位，都唔知佢哋搞緊乜。
熱刺嚟香港踢英超挑戰盃嗰陣，加里夫巴利齋操唔踢，又唔俾香港傳媒問關於轉會嘅事，大家當時都心知不妙，最後破健力士紀錄賣俾皇馬固然成為一時佳話，但拎住筆巨款連掃拉美拿同埋查迪尼等人都唔掂，蘇爾達杜同埋荷西保連奴等人頂盡亦只係合格，咁就人算不如天算喇！領隊波亞斯依家要做嘅，就係執番好個陣，幾十粒星但中看不中用都唔係辦法，再係咁落去莫講話要爭霸，連前四都好勉強，可能熱刺今季最大貢獻就係打起咗安祖斯唐辛，其餘碌碌無能。