皇馬巴利仔扭喊敵衛

ssamhohoho · 發表於 2013-11-4 10:59:02

<東方日報>

作客華歷簡奴變個人騷巴利仔扭喊敵衛

「大聖爺」爆發玩到對手喊！自投皇馬後傷多過踢嘅貴價貨加里夫巴利，已逐漸融入「銀河艦隊」，昨凌晨喺西甲作客3比2險勝華歷簡奴之役，佢繼續於右路話過就過，玩到對方後衞阿尼斯阿比拿喊出嚟，陰功到爆。
今季以9100萬歐元加盟皇馬嘅加里夫巴利，因為經常受傷而為人詬病，上周國家打吡輸畀巴塞更踢到冇晒影，被傳媒嘲諷為天價水貨。
不過「大聖爺」踢番右翼後即刻生番晒，繼上周中大炒西維爾7比3之戰入波助攻起孖，昨凌晨作客華歷簡奴續有貨交，開波冇耐C朗打開紀錄，之後輪到加里夫巴利個人騷，不斷羞辱鎮守左路嘅華軍後衞阿尼斯阿比拿，31分鐘佢快速推過阿尼斯阿比拿後用生蟲右腳沉底，賓施馬門前頂入。易邊後「大聖爺」繼續話過就過，48分鐘佢喺個波臨出界前，巧妙地用右腳挑波過埋阿尼斯阿比拿，睇到定晒橫傳C朗輕鬆掃入。
華歷簡奴教練占美斯見勢色唔對，決定換走畀「大聖爺」玩到人都癲嘅阿尼斯阿比拿，呢位25歲守將返到後備席嗰陣，好似爭輸玩具嘅細路仔咁，終於崩潰抱頭痛哭，就算隊友點氹佢都冇用，大人大者喊成咁認真慘情，及後華軍靠莊拿芬韋拉兩個12碼追成2比3，可惜未能挽回敗局。
專注助攻唔搶風頭
值得一提係，雖然加里夫巴利表現搶晒鏡，但今仗竟然一腳射門都冇，計埋上周中大勝西維爾，三日內佢送上四次助攻，全部都係醒畀C朗同賓施馬，C朗係皇馬頭號球星，賓施馬又係會長皮里茲及助教施丹嘅「契仔」，「大聖爺」咁識撈抵你發達。