叮噹豆沙餅-最普通和菓子（㝽女食譜）

khle · 發表於 2013-7-31 13:56:53

本帖最後由 khle 於 2013-7-30 21:56 編輯

無論你係十四歲定係四十歲，要問條女受唔受溝，始終開口嗰下有啲難度。有時整個甜品表下心意既浪漫又冇咁難開口。

叮噹豆沙包，都冇邊個唔識或者未見過哇？應該係最多人接觸過嘅和菓子，做法都好容易，餡料最普通係紅豆容，重有栗子加紅豆容，custard, 蠶豆容，同朱古力。總之你想加乜餡料都得，唔好太濕或多汁就可以試試。

餅皮材料（大約整到十塊餅皮）：
麵粉180g
一匙半茶匙梳打粉
三隻雞蛋
100g砂糖
一茶匙蜜糖
一茶匙豉油（如果想整綠茶口味，可以一匙綠茶粉代替豉油。）
一茶匙味醂
90cc牛奶

紅豆餡料：
紅豆300g（最好先浸一晚水）
砂糖250g
¼ 茶匙鹽

1 先將雞蛋打勻，打到有泡。

2 落糖，唔好一次過落曬，分兩到三次落。再落豉油，味醂，蜜糖打勻，再落牛奶。

3 最後落麵粉同梳打粉，又係分兩到三次落打勻，等大約三十分鐘。依個時候可以準備餡料。

4 紅豆連水開大火，見滾落一碗凍水，再等到滾，倒清啲水。再落水細火約煮兩個鐘。見紅豆淋咗就可以倒咗啲水。細火加糖煮容，慢慢搞見紅豆變容就可以。

5 到整餅！

用隻易潔鑊開中細火，擦小小油。用細湯殼做分量，整大約三到四吋直經，一殼一個，每邊煎約三十秒（或者開始轉咖啡色）。

6 餅皮凍咗就可以上餡料，夾好再細細力練個邊就搞掂。

如果係整俾女仔，攞個心形曲奇印，印個餅皮先上餡料。收嗰個只要唔係傻都會知你想講乜。媾日本妹，就記得整個紅豆容加忌廉。