德甲壟斷歐洲賽勢在必行

man36951 · 發表於 2013-4-25 22:56:45

德甲壟斷歐洲賽勢在必行

兩晚歐聯都係由德甲球隊火併西甲球隊，點諗到拜仁同多蒙特加加埋埋會以8:1狂灌巴塞同皇馬，難道兩國足球地位已經靜悄悄易位？如此一來，德國國家隊喺不遠嘅日子內，又會唔會取代西班牙國家隊，近年壟斷所有冠軍嘅局面呢？

以上嘅假設絕對會成立，大家睇下歐霸方面，所有德甲球隊都悉數突圍分組賽，已經係一個示警，而事實上，拜仁正正係行緊皇馬條路，就係盡收天下兵器，但喺買賣方針上面，拜仁買嘅球員大部份都好啱使，相反銀河艦隊經常收購次貨，左閘法比奧干查奧就證明咗係一大敗筆。

多蒙特行嘅路就似足巴塞，佢哋鍾意玩青訓，姑勿論馬里奧葛斯轉會在即，但呢位自家產品喺效力期間的確貢獻良多，另須留意多蒙特同拜仁雖然球星多，但並唔係「One Man Band」，根本唔會有美斯C朗缺陣就成隊波降格嘅情況出現。