晨曦VS佩斯寶 佩斯寶詐死賽事被迫腰斬

man36951

2013亞洲足協盃 - 日之泉JC晨曦迎戰佩斯寶
半場佩斯寶輸7：0, 兼有1位球員受傷,
下半場無耐輸到8：0...之後佩斯寶一傷傷六個球員,
佩斯寶冇人換兼場內唔夠法定球員,腰斬入場！

註:
客隊只有十二名球員來港, 佩斯寶上半場派出8位前鋒，而唯一一位後備球員亦已被換入。
上半場客隊陣容 1-1-8

man36951

日之泉JC※※ 8:0 佩斯寶(印尼)
巴利 3'
梁子成 6'
巴利 12'
羅拔圖 16'
⋯⋯ 梁子駿 31'
梁子駿 37'
巴利 39'
梁子成 48'

man36951

亞協盃發生極欠體育精神的事件，佩斯寶在下半場打至64分鐘時，因為有第5個球員「忽然」受傷，結果泰國球證馬哈柏宣佈比賽人數不足，賽事被迫腰斬，當時晨曦已經領先至8:0。晨曦主場迎戰印尼球隊佩斯寶。上半場2分鐘，巴利近門抽入，為入球騷展開序幕。6分鐘，梁子成左路傳中，皮球竟直入網窩。10分鐘，巴利近門頂入。16分鐘，羅拔圖禁區頂罰球直入。31分鐘，梁子駿接應楊賜麟的妙傳後近門射入。37分鐘，梁子駿單刀射入。40分鐘，巴利近門射入。上半場晨曦已經領先至7:0。

下半場佩斯寶已經10人應戰。47分鐘，梁子成再入1球。之後佩斯寶不斷有球員疑似詐傷，最後球隊有伊雲圖、查華、派亞廸、卡恩廸及沙普路被抬出場，比賽因法定人數不足7人而於65分鐘腰斬。

賽後佩斯寶以不諳英語為由而多次迴避記者的提問，並將責任推至多名球員停賽及財困而影響安排。至於晨曦招重文坦言，一早已知印尼足球問題多多，唯想不到比賽以此作結，而隊長羅拔圖則以「羞恥」去形容事件。

tommylam2013

吾系咁攪野吓

yamamoto

亞洲足協盃F組賽事
今晚(4月9日)在旺角大球場舉行的亞洲足協盃F組賽事，由日之泉JC晨曦主場迎戰印尼的佩斯寶，比賽至65分鐘，因佩斯寶未有足夠法定人數在場比賽，於是裁判員鳴笛終止賽事，當時日之泉JC晨曦領先8:0。今天的入場人數為463，購票人數為398，門券收入港幣$11,100元正。
--------------------------------------------------------------------------------

小弟有幸就係呢463人既其中一位...
下半場佩斯寶得番10條友跟住就9個到8個...
都知道佢地想玩野架喇，結果真係要腰斬比賽
附近有個伯伯係度講佢入場睇左三十年波都未遇過既事
有個職員叫我地留番張飛話可能有錢退返都唔定
又有個阿姐話都有8個入球睇算係咁啦
唔理佢會唔會退錢定係飛換飛都唔關我事
因為我要好好保存呢場令我親眼大開眼界比賽既波飛黎留念

yamamoto

亞洲足協判左晨曦贏8比0

http://www.the-afc.com/en/afc-cup-2013-schedule-results.html

不過拉迪恩3比1贏左仰光聯
佢地兩隊都有9分而且仲要對佩斯寶
所以晨曦實際上已經係出線無望

yamamoto

在場有唔少佩斯寶既球迷
估計佢地係香港居住既印尼人

may313

kakaka very funny

Kick Off

yamamoto 發表於 2013-4-10 00:33
在場有唔少佩斯寶既球迷
估計佢地係香港居住既印尼人

嘥晒 fans 撐場

man36951

波係圓嘅，呢句至理名言相信好多球迷都好認同！但係玄到好似尋晚晨曦主場對佩斯寶嘅亞協盃咁，搞到因為唔夠人踢而腰斬，吾港波不得畀「爆趣」。
南亞波一向蠱惑多，睇怕大家亦聽過唔少千奇百趣故事，今次呢隊佩斯寶，球會因為財困搞到要印尼足總籌旗先至踢得成亞協盃，點知今場勉強湊夠人飛來香港，都要踢到一個二個中晒化骨綿掌、無影腳而離奇受傷！其實無論輸幾多球，只要捱到完場，都叫有番少少體育精神；而家咁搞法對自己毫無得益之餘，或多或少都會影響印尼球壇聲譽，呢場大龍鳳究竟為乜呢？

南華前幾年勇闖亞協盃4強坐爆香港大球場，相信唔少球迷仲記憶猶新；之後「畢基的風」——畢特同基士文吹到來香港，仲令南華好一陣子登上亞洲足協網頁頭版，可以話幫香港足球攞過吓彩！之但係亞協盃唔少比賽城市途程偏遠，兩名球星因難忍轉十幾廿個鐘頭飛機而開口表示不滿。另外有指東南亞足球乃假波溫床，年初先揭發歐洲假波犯罪集團基地就係位於新加坡；早前新加坡淡濱尼對印度東賓高嘅亞協盃賽事，亦涉嫌造假而拘捕相關球證；依家又搞單腰斬鬧劇，試問係咪應該認真諗吓，呢個亞協盃真正嘅存在價值？

積弱多年嘅香港足球都叫有個鳳凰計劃改革，但係亞洲足協呢幾年都係由西亞國家話事人把持大局，連番傳出利益輸送醜聞，適逢今年係亞洲足協主席選舉年，幾名西亞地區候選人嘅背景都惹來質疑，國際足協甚至要求佢哋呈交亞洲足協改革方案，可想而之，亞洲足球累積落嚟嘅問題有幾嚴重。

睇番今屆兩支參賽嘅香港代表，喺港甲聯賽包尾嘅晨曦仲要為護級掙扎，至於力爭聯賽三連霸嘅傑志，亦少咗前兩季嘅霸氣，依家應該為亞協盃定係聯賽博盡？認真戥教練甘巴爾進退兩難！吾港波不禁想起早幾年亞協盃入場人數只得小貓三四隻，被一眾香港球隊視為雞肋嘅尷尬局面，或者趁住今年亞洲足協大執位，將呢個亞協盃制度順手整頓埋，對整個賽事同香港球隊來講，不失為一件好事。唔使好似呢場咁，客軍要遠征舟車勞頓，球迷入場迫住睇客軍Hea踢，大家都真係唔想貼錢買難受咁氣頂！

tuvwxyz

罰佩斯寶末來5季不能參加亞洲足協盃.

ozogg

有冇可能有人買咗輸八粒呢？

yamamoto

tuvwxyz 發表於 2013-4-10 13:32
罰佩斯寶末來5季不能參加亞洲足協盃.

我諗呢隊佩斯寶都冇心參加亞洲足協盃
罰佢地呢樣野冇咩用喎

alexgameboy

體育精神何在?

man36951

周二在亞協盃因5名球員「忽然」受傷而令賽事被迫腰斬的印尼球隊佩斯寶，周四宣佈將會考慮退出今屆賽事。周二亞協盃晨曦主場對印尼球隊佩斯寶的賽事，比賽至下半場64分鐘主隊遙領至8:0時，由於佩斯寶的5名球員相繼「忽然」受傷，致令賽事因比賽人數不足而被迫腰斬，而在這次於香港的「羞恥」表現後，球會周四宣佈考慮應否退出今屆亞協盃。一名佩斯寶的發言人說：「己隊之表現絕對羞恥，是印尼的恥辱，他們士氣很低落，他們被拖欠工資，又不適應時差和疲倦，我們只在比賽前一晚才買了機票，是即日飛去比賽的。」這名發言人繼續補充說：「印尼足總說如我們退出的話，印尼將會失去未來的參賽資格，並應承會向我們提供經費，但這是從未做到的，我們對被指責感到很憤怒，現在要該做的事情就是退出。」佩斯寶踢罷對晨曦的賽事後，本來還餘下兩場分組賽要踢，但看來極可能會「爛尾」收場。

alexgameboy

man36951 發表於 2013-4-11 23:01
周二在亞協盃因5名球員「忽然」受傷而令賽事被迫腰斬的印尼球隊佩斯寶，周四宣佈將會考慮退出今屆賽事。周 ...

啲球員其實都好慘, 有汗出無糧出
要怪就怪印尼足總

handsome1971

man36951 發表於 2013-4-11 23:01
周二在亞協盃因5名球員「忽然」受傷而令賽事被迫腰斬的印尼球隊佩斯寶，周四宣佈將會考慮退出今屆賽事。周 ...

都係錢的問題

perryy

罰佢來季冇得參加呢類型盃賽就好,一d體育精神都冇

HKKnight

60蚊都當掉左啦

弓長張

印尼.......唉