劉蔚萱火鳳凰重生「田雞女」踏上主播路

超人Tiga · 發表於 2013-3-30 14:49:17

本帖最後由超人Tiga 於 2013-3-30 20:44 編輯

劉蔚萱（Jenny）這名字對大家來說可能有點陌生，但「田雞女」、「Chok之天使」及「嘴刁鵰」這三個稱呼相信會較有印象。Jenny去年首次擔任劇集女配角，卻被網民炮轟演技生硬，加上「田雞事件」搞到滿城風雨，對新人來說本是一大挫折，但Jenny卻視之為磨練，更開始踏上娛樂主播生涯！

劉蔚萱2011年參加香港小姐，但未入圍即落選，幸好「塞翁失馬，焉知非福」，同年加入第25期無綫藝員訓練班後，被監製錢國偉選中成為第五代天使，於2011年加入《變身男女Chok Chok Chok》節目，成為「Chok之天使」中的「棉花糖」。

教戲事件有收穫
做開有條路，2012年又加入《五覺大戰》做神獸天使「嘴刁鵰」而為觀眾所熟悉。雖然畢業後Jenny一直有拍劇，但都是不太起眼的小角色，去年終於有機會彈出，在劇集《心路GPS》中飾演李司棋的未來媳婦。未知是福還是禍，去年拍攝期間卻爆出遭導演張永豪粗暴教戲事件，Jenny不但慘被推頭撞牆，更被裝住田雞的膠袋笠頭，事件搞到滿城風雨。

事隔大半年，該劇播出後難免再勾起觀眾反應，也許作為新人的Jenny經驗不足，其演技亦開始備受質疑，不但彈Jenny「戲屎」兼角色乞人憎，更有網民指對她洗腦式的對白「阿B！阿B！」感到厭煩。對於種種批評，Jenny卻轉化為正能量：「我唔覺委屈，係新人就預咗畀人彈，當係磨練囉！唔試過又點知自己有咩要改。我已經算好好彩，我只係一個冇咩背景嘅學生，好多訓練班出嚟嘅新人都只係做路人甲，但我有對白有角色已經好開心。件事（遭導演田雞膠袋笠頭教戲）發生後，我從來冇投訴過，因為我知大家都係為件事好，我反而好多謝監製畀機會我拍呢套劇。」

錄起劇集研改善
被網友彈爆的Jenny自知演技幼嫩，所以力求完美的她會把演出的劇集全部錄起，研究有否有待改善的地方：「其實唔只《心路GPS》，其他有出過鏡嘅劇都會錄，好似《巴不得媽媽…》、《老表，你好嘢！》咁，再睇番自己有咩做得唔好。我好同意以前訓練班有老師講過，做小角色都有好多嘢學，唔使大角色咁做死一個角色。而且我好鍾意同前輩一齊，好似之前拍《心路GPS》咁，每次拍完都一齊食飯，其實日常生活中先會喺佢哋身上學得最多嘢！」

奸角預咗畀人鬧
不過第一次演「大角色」，Jenny坦言備受壓力，再加上「田雞事件」，令她曾經壓力爆煲喪喊，但她非常感激身邊人對她的支持：「最感動係有一次有個導演經過，同我講『做奸角要預咗畀人鬧，最緊要有人睇之嘛，做奸角最成功就係令人討厭，想當年李香琴做奸角都畀人當街掟雞蛋啦！』佢講完，真係幫我打咗支強心針。經一事長一智，我覺得今次學到好多嘢，新入行預咗多挫折，但呢個係好好嘅推動力。」自言一入行是個急性子的Jenny，坦言「田雞事件」後變得成熟：「以前我乜都好急，但依家覺得好多嘢都急唔嚟。」

作為新人，樣樣都想試想學，在大學時期已是辯論隊成員的Jenny，現時亦作多方面發展，在娛樂新聞台擔任主持：「未拍劇之前已經做緊，不過係Part Time形式，之後拍劇要兩邊走，覺得學唔到嘢，所以暫時都想專心做主播先。」對於拍劇與做主播兩樣性質不同的工作，Jenny說：「拍劇變化多啲，冇咁Routine（常規），相反主播工作就比較有規律。」

後記：出賣事業線
做過天使的Jenny平日肯搏肯露，還以為她會考慮走性感路線，但原來她在讀書時期非常男仔頭，經常以素顏Hea爆Look返學。當同學知道她要出賣事業線後，更狠狠地拋下一句：「吓？你都肯露？你有嘢露o架咩？」究竟這是讚美還是揶揄？