|
|
超市員工做Hero
9萬班費「乙組仔」入決賽！英乙球隊巴拉福特尋日凌晨喺英聯盃4強戰次回合，憑「超市員工」占士漢臣入波，以總比數4:3淘汰英超嘅阿士東維拉，成為51年嚟首支殺入聯賽盃決賽嘅第4級別球隊，進軍溫布萊，感動到爆嘅主席羅恩仲承諾季尾會自掏腰包，拉隊去拉斯維加斯狂歡慶功！
主席季尾拉隊去賭城慶功
巴拉福特喺聯賽盃連斬韋根及阿仙奴，4強首回合輕取維拉3:1，昨晨次回合作客雖然輸1:2，但仍以總比數4:3殺入決賽！今次係繼1962年嘅羅奇代爾後，第一支第4級別球隊進軍聯賽盃決賽，亦係巴拉福特自1911年奪足總盃冠軍後，102年嚟首次喺大賽爭標，難怪喺08年抗癌成功嘅門將杜基High爆：「好似發緊夢咁！」
主席羅恩喺賽後除咗同球迷一齊慶祝，仲向英國《太陽報》激動自爆慶功計劃：「今晚係歷史一刻！我同班球員講如果佢哋可以帶我去溫布萊，我就帶佢哋去拉斯維加斯！」
維拉球迷雪球掟「巴粉」
獲選賽事最佳球員嘅入球功臣占士漢臣，就由初出道嗰陣霉到要喺超級市場打工維持生計，到今日名留青史成為球會英雄，令佢相當感動：「乙組球隊去溫布萊比賽？It's a Dream！」其實占士漢臣係巴拉福特陣中唯一用真金白銀買番嚟嘅球員，除咗呢位喺2009年以7,500鎊（約9萬港元）由非聯賽球隊加盟嘅前鋒外，陣中其他球員全部免費，亦即係話，巴拉福特嘅組班費連一個英超球員周薪嘅10分之1都未必有！
對家嘅維拉領隊林拔，對球隊羞家出局雖然極度失望，不過仍相當有風度咁祝賀巴拉福特，但唔係個個維拉人都咁有品，賽後有班「維粉」被人影到用雪球攻擊巴拉福特球迷坐嘅旅遊巴，勁無恥，有「自己友」睇唔過眼，喺條影片度留言：「我係維拉球迷，但我覺得呢啲雪球係應該掟維拉班球員囉！」 |
|
在線雷達
發表於 2013-1-25 06:17:21
廣播
置頂
超級提昇
強效提昇
推舊帖
收嗲鳥
油顏色
