我自巴黎系列：巴黎十景之一，二。(部份自拍）

老牛食嫩草 · 發表於 2013-1-23 18:38:19

本帖最後由 minotaurus 於 2013-1-23 18:48 編輯

我愛巴黎 --  巴黎十大景點

巴黎係全世界最多遊客嘅城市，如果比我揀一個城市旅遊，肯定就係巴黎。
我地出門旅行，不外符係為左一下幾樣：
1.    風景，巴黎有，而且好多。
2.    名勝，巴黎都有，而且多。
3.    歷史， 1000 年左右啦。古迹羅馬多D，不過，聯合國教科文組織總部設在巴黎。
4.    美食，世界美食之都排第一，包羅萬有。
5.    購物，哇，對老牛黎講，第一米蘭，第二就係巴黎，第三東京，第四倫敦。
6.    酒店，全世界最好嘅酒店，好多都系巴黎。例如 Ritz ， Plaza Athenee就係發源於巴黎。De Crillon, Meurice, Le Bristol, George V 等等都係世界一等一嘅酒店，而且冇分店，咁樣先可以保持佢地尊貴獨特嘅氣質。.其他國際連鎖品牌就無需要提啦，個個集團都一定要係巴黎霸返個位。

而家簡單介紹巴黎十大景點，排名不分先後，如果大家唔夠喉，老牛會再提十一至二十嘅景點。

1. 巴黎鐵塔，呢個肯定係全世界最出名嘅塔，亦都係最多被人影相嘅塔啦。法國政府於1889年嘅巴黎世界博覽會而建立，本來預算幾年就拆，點知一企就企左百幾年。塔高320米，由1889年到1931年紐約帝國大廈建成之前，係全世界最高嘅建築物。艾菲爾設計嘅鐵塔係幾何學，物理學嘅最高成就，全塔建造得極之輕盈而穩重。無論五十年或一百年一見嘅強風從任何方向吹，高塔嘅頂部移動都唔會超過7cm. 我地香港好多三四十層大廈都唔止呢個數字。仲有，以大廈佔用嘅地面面積乘以高度，空間嘅空氣就唔止一萬一千噸，即係話，個塔仲輕過佢佔有嘅空氣。遊客可以坐電梯上57米嘅第一層，轉電梯上115米嘅第二層，最後上第三層 274米，天氣好嘅時候，可以睇到80公里以外嘅景物，因為附近冇高山，而呢層最多可以同時容納800人，等電梯排隊上落，旺季請預留超過一小時，因為每年有600萬人次，即係平均每日一萬六千五百人。
鐵塔用左特別嘅油漆，夜晚通過燈光照明，效果好特別，世界上唯有呢個景點係日夜都咁靚，而且感受唔同嘅。
人地一百幾年前世博會，而家仲有咁靚嘅鐵塔留低比大家讚賞，我地三年前嘅上海世博，大家印象已經模糊，好似比人遺忘左啦。

eiffel-tower-paris-cityscapes-france-urban-HD-Wallpapers.jpg

老牛食嫩草 · 發表於 2013-1-23 18:38:48

本帖最後由 minotaurus 於 2013-1-23 18:47 編輯

2. 凱旋門，呢個又係全世界最出名嘅凱旋門，世界上有好多凱旋門，由羅馬時期開始就有。但係冇一個有巴黎嘅凱旋門咁受歡迎。 1805年12月2日拿破崙系奧斯德立茲Austerliz（今日匈牙利），大勝奧地利/俄國聯軍，回國後就開始計劃建立呢個凱旋門以誌紀念。佢亦答應當時嘅軍隊，回國時你地會從新建嘅凱旋門下經過。第二年佢就開始建造，但係，拿破崙軍權嘅起起落落，領到呢個凱旋門1836年先完全建好。
凱旋門記錄左法國1792年以來志願軍抵抗奧地利及普魯士（即係今日嘅德國）嘅場場戰績，用不同嘅方法，例如雕塑，盾牌，刻名，牌匾，浮雕等等記錄拿破崙系歐洲，非洲，亞洲土耳其嘅場場戰役。系凱旋門內部正中嘅係第一次大戰無名軍士紀念碑，裡面有一個長明火，令人見到不勝唏噓。第一次大戰勝利，第二次大戰勝利，法國部隊都係由呢個凱旋門操入巴黎。拿破崙本人於1821年去世，但係佢嘅靈柩就等凱旋門建好後，於1840年由聖海倫娜島運回巴黎，徐徐從凱旋門下面通過，然後送到榮軍院安葬。
凱旋門高52米，遊客可以登高，塔頂係一個平台，，景色甚佳，因為於1852年，侯斯曼伯爵受拿破崙三世委託，將將舊巴黎重建。以佢嘅魄力，建造今日嘅巴黎，佢亦都以凱旋門為中心，用十二條放射線向各方向延伸出去。其中由今日嘅羅浮宮前金字塔開始，至到新凱旋門，一條大中軸線超過8公里長，其中一邊就係全世界最有名嘅香榭麗舍大道啦。