亞視末日發惡炒逃學5藝員戚黛黛,車車被炒

正義高達 · 發表於 2012-12-22 20:12:41

亞視騎呢事再獻新猷！昨日冬至竟「無厘頭」請多名藝員食無情雞，事緣本星期亞視突然舉辦演藝訓練班，但教材竟是開台史及立場，嚇走不少藝員，投資者王征不滿出席率太低，龍顏大怒「開鑊炒人」，看來世界末日未成真，戚黛黛、張啟樂等無辜被炒最陰功！

亞視近年收視屢創新低，多個節目創出零收視「佳績」，投資者王征早前又在政總跳騎馬舞反對發免費電視牌照，效果「震撼」！未知是否知恥近乎勇，近一星期亞視突然「發憤」，要求年資淺的藝員出席演藝訓練班，導師則由「自己友」高層及一線藝員包辦，邀請朱慧珊、林韋辰、陳啟泰及劉錫賢等任導師，所有亞姐、亞生、星光幫及合約藝員均要到大埔亞視總堂接受課程，上課時間為期四周，周一至周五，由早上10時至12時及下午2時至5時，接近上班族返工時間。

本星期一開課竟主講亞視55年發迹史、立場及對發牌的睇法，猶如洗腦教育，內容沉悶，不少藝員上課後認為「中伏」，其後兩日紛紛缺席，亞視高層大感不滿，周四要求合約藝員加簽條款，承諾要積極配合公司培訓項目，至昨日投資者王征「御駕親征」主講時驚覺出席率甚低，大怒的他即搵缺席者祭旗，連炒四至五名藝員包括前港姐戚黛黛、男藝員張啟樂、o靚模陳綺雯（Aki）及主持張紫櫻（車車）。

戚黛黛前路茫茫
此舉令不少藝員大感錯愕，紛紛指摘亞視太絕情，認為強迫要求藝員無薪上堂等同白做，不滿聲此起彼落：「點解要硬逼藝員上晒啲堂，好似做office工咁？」、「既然公司已認同大家係藝員身份，點解要由頭上堂？」、「又冇開劇做咩教演戲？」據知，黛黛及車車昨日齊齊返公司接信，前路茫茫認真慘情！

而獲邀做導師的陳啟泰（Ken）及林韋辰均已婉拒，對於有同事因缺席被炒，阿辰驚訝地認為應以和為貴：「增值咋喎！呢個處罰比較重手，應該警告先。」他表示常不在港，而且獲派題目是「腦筋急轉彎」，非常空泛：「如果幫新同事了解多啲工作嘅嘢係ＯＫ，但應該搵專業人士教。（人工？）未傾o架！」Ken則表示並非讀演藝班出身，不知如何教人，亦不擔心say no會捲入炒人風波。

亞視高層葉家寶回應：「被解僱藝人係因為配合唔到公司要求先被解僱。（藝人覺得上堂唔合理？）呢個唔係演藝課程，係訓練課程，係天公地義，佢哋配合唔到，公司至有所行動。（佢哋合約訂明要上堂？）被解僱者合約係有寫。」葉家寶強調「星光幫」亢帥克、亞姐周嘉莉及藝人秦啟維因表現良好獲加薪。