王子教你做個超渴市的完美女友

鸚鵡王子 · 發表於 2012-12-20 21:20:58

男生對女生另有一套不膚淺嘅審美標準，而家王子偷偷醒姊妹們幾門絕技，教你做個100分嘅完美女友，無男生會想離開你！（註：王妃用嚟教佢既朋友，我偷偷地用嚟教各位姊妹

）

1.精靈幽默感
其實無乜男生會真係拎自己女友同外國內衣model比較，佢哋最渴求又覺得最難搵嘅，反而係一個精靈又幽默嘅女生。因為幽默感最能反映大家嘅思想係咪夾得來。

男生眼中嘅女生幽默感，一嚟可以化解難堪場面，當佢唔小心book咗一間唔滿意嘅餐廳食晚飯，你都可以睇成係一件搞笑嘅事，唔會奄尖聲悶；二嚟代表你有自信，會間中笑吓自己嘅瘀事，又笑吓佢嘅（例如佢嘅初中薯頭look），唔會鵪鶉到唔敢得罪佢。當佢知道同你一齊會充滿笑位，就會黐實你唔放。

2.對外表現痴纏
差唔多所有男生都鍾意女生喺人面前對佢表現得特別熱情，咁會令佢更有自信，唔係話要喺街同佢French kiss，但一啲細微嘅性感小動作，都足以表達你好愛佢。

行街時失驚無神鍚佢一啖，搭車時哄落佢手臂到，呢啲都係公開嘅愛的表現，會令到佢好冧，當然，亦唔能夠做得太過火，咁會令佢感到唔自在。當佢響應你嘅動作，自然而然地走近你，你哋嘅愛情火花就會越燒越旺。

3.關心要適量
男生想要一個關心佢嘅女友，但絕對唔係想要多一個阿媽。喺佢哋眼中，幫佢整直衣領、批評佢呢樣嗰樣唔掂嘅異性，就係阿媽。佢心目中嘅女友，應該係維護佢、力撐佢，當佢返工唔順心，讀書有挫折時，女友會全然接受佢嘅弱點，而唔係指指點點，仲會鼓勵佢去解決問題。

當佢感受到同你一齊有十足安全感，自然想更多時候對住你，相反，當你將佢當作小白兔般呵護，佢就想立即上演一套《Prison Break》。

4.認真咁讚佢
可能你會想佢多啲讚你靚，但如果你反客為主，成日讚佢靚仔，佢未必如你所想咁開心。男生都希望女生愛上嘅唔單止係佢嘅外表，而係一啲無咁表面出嘅過人之處，例如佢講嘅嘢好搞笑，令你好開心、你鍾意佢抱住你嘅感覺等，呢啲都令佢覺得自己獨一無二，而且俾佢知道，無論佢個樣係點，你都一樣覺得佢好吸引。所以，你嘅讚美要真誠同有內容。

5.討好佢班兄弟
女友嘅其中一項義務，就係放生男友去guys’ night，男生最反感女友阻止佢同班friend去玩，故不妨趁呢個空檔，自己都嚟個girls’ night out！

有啲醒目嘅女友，更會識得利用guys’ night討好男友班friend，例如陪男友等friend，人齊時識自動退場，班friend見你咁順得人，下次你哋鬧交時，佢哋都會幫吓你口。對男生嚟講，女友同兄弟保持友好關係非常重要。你未必真係需要鍾意呢班成日叫你男友去玩嘅朋友，但尊重佢哋嘅兄弟情，已經算係做好本分。

6.俾佢見吓你嘅其他男性朋友
雖然男生唔肯承認，但佢哋的確會妒忌你同其他男仔friend。你當然唔使因為拍拖而同呢啲兄弟斷絕來往，不妨介紹你啲兄弟俾男朋友認識，當佢知道對方無威脅性，就會放心。約齊大家唱k或者食個飯，只要間中同佢做啲親暱動作，肯定一下佢嘅地位，就可以俾到信心佢。

聽王妃講呢六招，萬試萬靈，諗諗吓王妃都好似有對我用過