超儀挺身促公開對質

閃電高達 · 發表於 2012-12-13 13:57:53

藝人被指於餐廳吸毒事件發生至今擾攘多時，謠言滿天飛，昨日五位被捲入風波的藝人包括徐濠縈、何超儀與丈夫陳子聰、葉佩雯及李璨琛齊聯同律師召開記者會，交代當晚情況以求清白，並公開要求與當事人公開對質！眾人亦被問到會否驗血以正視聽，但他們強調根本沒必要為不實指控驗血。

自黃浩聲稱有藝人於旗下餐廳涉嫌吸毒並報警後，事件可謂掀起滿城風雨，亦引發不少謠言及揣測。昨日，五位被捲入風波的藝人包括徐濠縈、何超儀（Josie）與丈夫陳子聰、葉佩雯（Grace）及李璨琛聯同代表律師蘇志榮，以及另外七位「飯友」於灣仔一間酒店召開臨時記者會，逾半百傳媒採訪。陳子聰、Grace、阿徐、蘇志榮律師、Josie與琛仔坐在前排，其他「飯友」則坐在後排，當中包括梁漢文太太Karen，眾人神色凝重，只有Josie較為輕鬆。首先由代表律師發言，指出召開記者會的四大重點包括再次重申他已代表兩位當事人於上星期五到了灣仔警署報案；律師於昨日再到警署提供進一步資料備案；懷疑是否有人報假案企圖妨礙司法公正，希望警方作出調查；代表阿徐與Josie向黃浩發出律師信，如有需要將會向法庭申請禁制令，禁制對方再發放錯誤訊息。

葉佩雯：點解唔交證據
其後，琛仔指今次記者會另一目的是希望說出該晚一直沒有被披露的情況：「之前我交代過一次，但冇媒體將我全部內容寫出嚟，希望今次可以公平公正咁畀大家知道件事。當晚我哋一行24人為朋友慶祝生日，作為藝人好少會Check單，由其他朋友負責Check，結果有朋友發現張單由七千幾變咗八千幾，感覺好似畀人呃錢。事後，有朋友喺微博發表個人感受，提醒啲朋友食嘢要Check單，點知引發起連串事件。有朋友識得餐廳老闆，個老闆就透過個朋友叫我哋剷咗佢，只係誤會。不過，即晚嗰位老闆就帶埋記者去報警話畀人恐嚇，成件事嘅開始就係咁，好無辜，好唔公平，冇諗過一年後會發生吸毒事件。」至於Grace亦指整件事匪夷所思：「一年前嘅事，歪曲我哋明明好健康嘅一餐飯變成吸毒，點解有片唔可以拎出嚟？點解唔交出證據？件事影響到我哋嘅家人，朋友同外界對我哋嘅睇法。」

一直未就事件回應過的Josie則解釋，因藝人每日都可能被胡言亂語、炒作的新聞困擾，覺得沒有必要回應，但指近期的揣測嚴重化，影響到家人、親友甚至老闆：「係我嘅老闆同Sponsor畀壓力要我澄清！我今日講完如果大家仲有唔清楚、有質疑，歡迎大家幫我哋邀請『佢』出嚟當面對質。（開記者會係咪好委屈？）冇錯！係委屈咗我哋好耐，好辛苦。（受到好大困擾？）就好似係喺黑暗中無啦啦畀人伸隻手指挖撻疤喺我身上咁。」而琛仔亦支持公開對質：「除咗對質，都希望佢拎出影帶，同埋牽涉嘅證人出嚟對質。」

現場有記者問到眾人可會以驗血來證明並無吸毒，五人即望望代表律師，由他代答：「主要交代番當日發生嘅事，希望大家就當日發生嘅事去問。」阿徐隨後繼續訴苦，指最無辜是女兒康堤：「要講嘅我上星期已經講咗，我老公已經陪我出嚟講咗。不過最無辜係影響到個女，去學校騷擾到佢同騷擾到其他家長，呢件事唔係事實點解要繼續去追查？已經發咗律師信畀對方，如果有人繼續造謠，會向法庭申請禁制令。（律師信係咪關於誹謗？）當然係有呢一樣。」問到可會要求對方公開道歉，律師表示這是法律程序之一，又指一班當事人會絕對協助警方調查，會應警方要求逐個見面，亦已有人已落口供。他又指要代表的當事人去驗血很不公平：「如果日日有呢啲報道指控，咁日日驗咪好得閒？」

李璨琛：要驗就一齊驗
記者會完結十多分鐘後，五人就驗血的提問再次召回記者，作進一步的澄清及補充。阿徐首先發言，並一臉認真地說：「呢個問題令到我哋好不安，點解要驗血去證明我哋係清白？我哋冇做過，點解要證明我哋係清白？」Josie亦嚴肅地說：「對方不斷話有帶同冇帶，又唔攞出嚟，點解我哋要驗血，雖然我唔介意去驗。」琛仔則振振有詞說：「要驗就叫佢一齊去驗。香港嘅法律精神唔係去證明自己係清白，唔通有人話我有精神病，我就要入青山。我唔擔心亦都唔介意去驗，但係冇必要。身為藝人成日畀人話呢樣話嗰樣，如果樣樣都要回應咪好無辜，但我哋唔回應又當我哋默認！」