羅錦慧揀拖友專吼穩重男

燕青小乙 · 發表於 2012-12-8 20:09:17

羅錦慧（Yong）是前5人女子跳舞組合Lacee Lacey成員，剛滿23歲的Yong坦言拍過幾次拖，現時不求男友靚仔有型，只求愛惜自己，年齡上限40，但要有少少童顏，成熟穩重，但切忌對方麻煩令她困擾。

羅錦慧（Yong）出道前曾接受當時唱片公司為期一年的訓練，之後才正式成為2011年度新進女子跳舞組合Lacee Lacey成員之一，可惜這隊組合只維持年半便解散，而籌備中的唱片亦胎死腹中。問Yong可知解散原因？她亦一臉不解地說：「係公司內部問題，有日公司同我哋講：『冇咗啦呢隊組合！』因為呢個係公司問題，所以都未對外講過，我又唔係好清楚。」至於未來大計？Yong坦言最愛仍是唱歌，希望還有機會出唱片。

舊愛中暑當鼠疫
事業受挫，哪感情方面又如何？現時單身的Yong坦言拍過幾次拖，最難忘的一段情維持了9個月，Yong笑言：「同佢拍咗唔算長，覺得難忘係因為發覺佢好多嘢都唔知道，但其實佢大過我喎。好似天時好熱好易中暑，但佢原來一直唔知中暑點解，佢以為中暑即係鼠疫，好搞笑！可能佢玩音樂，比較藝術家性格，唔會理其他嘢，好多生活瑣事佢都唔識，所以呢個人令到我幾難忘。」

談到擇偶條件，年紀尚輕的Yong即變得滔滔不絕：「以前好鍾意睇靚仔，但依家覺得靚唔靚仔唔緊要，最緊要錫我，一定要大過我，我鍾意成熟穩重嘅，最大40歲好啦，但又要有少少童顏，最接受唔到好煩嘅男人，我最怕男仔煩，最驚人問我：『你做咩唔覆我電話？』」果然仍是少女情懷總是詩。