張慧雯涉毒即被飛

燕青小乙 · 發表於 2012-11-27 14:02:17

繼女神苟芸慧和岑麗香等華姐獲無綫力捧上位後，2010年國際中華小姐季軍張慧雯（Candy）同樣獲無綫點名力捧，惟前晚她涉嫌藏毒被捕，事業隨時玩完！據知，無綫為免影響形象已計劃把她有份演出的兩套新劇換角，而無綫高層樂易玲昨日承認Candy已停工，其中一套新劇鐵定換角，看來她的星途凍過水！

無綫近年視中華小姐為培訓重點，曾捧紅不少華姐花旦包括陳法拉、鍾嘉欣及上位女神苟芸慧和岑麗香。眼見華姐合觀眾眼緣，據知無綫本打算食住條水再捧華姐，2010年華姐季軍張慧雯成為首選，因早前她在劇集《On Call 36小時》中「晶晶」一角獲好評，人氣急升，故Candy在即將開拍的續集《On Call 36小時2》中將升呢做第二女主角，與羅仲謙及岑麗香大搞三角關係，希望接住《On》劇個勢把她捧上位！

老竇陪入「城」壯膽
不過，Candy前晚涉藏毒被捕後，全城關注，電視城議論紛紛，加上無綫非常注重藝人形象，眼見今次事態嚴重，Candy的演藝事業隨時玩完，不少台前幕後戥她可惜！據知，有兩套新劇在手的Candy隨時畀人踢出局，新劇《師父‧明白了》和力捧之作《On 2》有機會易角，其中《On 2》與醫管局合作拍攝，有鑑於她涉藏毒令形象受損，被踢走機會更大，事業準備起飛即墜機，兼捲入藏毒風波，真是兩敗俱傷！

Candy被扣查一晚，早上離開警署後即向無綫高層樂易玲報告，下午即被樂易玲召回無綫電視城「照肺」兩個多小時。樂易玲昨日接受電話訪問時承認Candy已停工，《師》劇角色會換人︰「我同佢下午傾咗兩個幾鐘，佢嘅資深配音員爸爸都在場，大家好多嘢講，佢喊到我成盒紙巾都用晒！依家佢係停咗工，《師》劇會換角，因為要拍成個月，佢期間要配合調查，所以有咁嘅決定。」她相信Candy是無辜，並力撐她說︰「佢係好乖嘅藝人，個司機係佢朋友嘅朋友。（戥佢唔抵？）清者自清，呢啲交畀警方調查，佢都會盡力協助。」問到為何相信Candy但還要她停工？樂小姐說︰「雖然佢係乖，亦係基督徒，但要做番啲嘢畀公司同觀眾睇，證明佢係勤力演員。」至於《師》劇監製陳耀全在電話中說︰「我未係好了解個狀況，等公司畀指示。」而《On》劇監製潘嘉德在電話中被問到續集會否踢走Candy，他說︰「我唔喺香港唔知發生咩事，等我返嚟了解吓先。」

岑麗香「吸毒唔好」
此外，同屆華姐冠軍兼於《On2》劇中有機會合作的岑麗香昨日在電話中得悉Candy涉藏毒被捕後大感愕然︰「嘩！大家參選時識，嗰陣我哋係企喺隔籬，覺得佢好Friendly、好熱情。吸毒唔係好事，我自己唔會掂，當然唔希望件事係真！」而於《On》劇中曾傳緋聞的羅仲謙在電話中說︰「唔係好清楚發生咩事，唔方便評論，印象中佢係一個勤力工作嘅女仔。（慰問？）平時私底下都好少接觸。」