極速時代來臨？3 香港 x iPhone 5 港鐵 4G 速度實機試 (轉貼)

adriant · 發表於 2012-11-21 00:36:12

最近一口氣打通 iPhone 5 以及港鐵 4G 連接的 3 香港，無論用 iPhone 5 又或者其他 4G 手機，一樣可以係港鐵站內用 4G 極速上網，就算係繁忙時間，上網都唔會再慢吞舌！到底 3 香港的站內 4G 表現如何，今次就帶大家齊齊實地測試！

今次測試除了會用上通訊辦的測速軟件之外，仲會從大家平時會用的日常功能應用入手，睇睇在 4G 的幫助下，係港九唔同地方用 iPhone 5 配合 3 香港的實際使用效果係如何！

3 香港跟其餘香港的主要 4G 網絡商一樣，除了會使用高速的 2600MHz LTE 之外，亦會將現有的 1800MHz 升級至提供 4G LTE 服務，作為室內以及港鐵站內提供 4G 服務的主要頻段，建構覆蓋更全面的雙頻 4G 網絡。

至於港鐵車站內的 4G 覆蓋，3 香港 4G 目前已延伸至尖沙咀、油麻地、太子、油塘、以及港島全線，下月底將打通將軍澳、東涌、迪士尼及機場快綫所有港鐵站，觀塘綫及荃灣綫餘下的港鐵站則將於明年一月下旬全面打通，大家好快就可以享受到更全面的 4G 上網體驗！

而今次測試用的 iPhone 5，就正正支援 1800MHz LTE，可以係地面地底連接 4G 暢通無阻。其實 3 香港亦曾強調過它們擁有全港最多的可提供服務的無綫頻譜資源，有興趣的用家可參考之前的報導，但到底實際表現如何，即睇以下的測試報告！

速度測試！OFCA 測速 App 表現評定！

要測試 3 香港 4G 網絡的速度，首先當然會用到通訊辦所推出的網絡表現測試軟件。以下測試除了在港鐵站內進行之外，亦會在兩大地面熱點 - 銅鑼灣 SoGo 正門及旺角滙豐銀行門外進行測試，而每次地點均會進行測試 3 次，取中間的速度結果。

根據測試結果，用支援 1800MHz LTE 的iPhone 5 配合 3 香港 4G 網絡，平均可達到 15Mbps - 30Mbps 的上下載速度，而且入到港鐵站內速度亦無因此而減低，仍然維持到 4G 的高速連接。

myTV 睇片要等幾耐？

除咗會將影片下載到手機慢慢睇之外，唔少香港用家都選擇會 myTV 即時上網煲劇又或者睇電視直播。咁到底係使用 4G 的情況下，載入直播的等候時間要幾耐呢？今次就試試用 myTV App 連接 J2 直播，睇睇在唔同的港鐵站內，等幾耐至有片睇！

各地點的載入時間相當接近，平均只需 4-5 秒就可以睇到 myTV 直播，比起一般 3G 網絡下所需的 20-30 秒，速度可以話係大有進步！

1080P 串流影片載入速度測試！

用得 iPhone 5 + 4G，相信大家都唔會滿足於 YouTube 流動版 App 的低畫質影片質素喇！可能有唔少用家都會好似小編咁，採用 Jasmine 之類的第三方 YouTube App，就係貪佢可以睇返高畫質、甚至達 1080P 的影片質素！

今次 4G 測試，就會試驗一下用 3香港的 4G 網絡，載入一段約 2 分鐘的 1080P Youtube 電影預告，睇睇完成載入 (白色進度條) 所需時間要幾耐。

以 3 香港的 4G 網絡，完全載入一段約 2 分鐘的 1080P 影片，時間約為 18 - 34 秒，而且就算在港鐵站內，速度亦唔會受到影響，好似油麻地同太子，所需時間甚至少於 20 秒，速度拍得住屋企用嘅寬頻。

Apple Store 遊戲要等幾耐？

相信大家用 iPhone 都試過，係街上面下載新 Game，等咗好耐都未 Download 完。其實支援 4G 嘅 iPhone 5，就可以幫到用家極速下載新 Game。

今次測試就用 App Store 中免費下載的 Hello Kitty 寶石方塊，檔案體積為 23MB，到底用 3 香港 4G 由開始下載到完成安裝要幾耐？跟據測試結果，平均只需 20 秒左右就完成哂下載及安裝步驟，速度有驚喜！

FTP 檔案上 / 下載測試

最後為 3香港 4G 及 iPhone 5 準備的測試，就是直接用 FTP 軟件「FTP Sprite」，連接上本地的 FTP 伺服器，分別進行 20MB 及 50MB 檔案的上 / 下載速度測試，睇睇當傳輸大型檔案時，3 香港的 4G 網絡表現如何。

總括來講，20MB 檔案的上下載時間大約為 5 - 12 秒，50MB 檔案則只需 13 - 30 秒之間。而最有驚喜、速度表現得最快上環港鐵站內，分別只需 5 秒左右就完成 20MB 檔案的上 / 下載工作，而 50MB 檔案亦只需 13秒 (下載) / 10.78秒 (上載)，速度甚至及得上家用寬頻。如果經常需要在街上傳輸大型檔案的話，用 3香港的 4G 網絡的確幫到手！

總結

其實近年透過網絡升級工程，3 香港的上網速度已經有唔少提升，今次打通埋 iPhone 5 及港鐵站內的 4G 連接，就更加可以將本身係「地上獨享」的 4G 高速連接帶入地底。

根據配合 iPhone 5 的測試結果，就算入到港鐵站月台，3香港 4G 速度亦唔會因此而減慢，就算係全高清串流播放、又或者大型檔案上下載，都可以應付得到。而且除咗人多繁忙的車站例如尖沙咀、北角、旺角、太子等等之外，係上環至灣仔的列車入面，都可以無間斷收到 4G 網絡，保持到高速上網效果！