萬獸之王----獅子

鸚鵡王子 · 發表於 2012-10-16 16:35:30

王子今次想同大家分享既動物，就係數有萬獸之王稱譽既---獅子。叫做萬獸之王，今次大把圖片你睇。

獅子，或寫做獅，學名Panthera leo，係種住響非洲同亞洲嘅大型貓科動物，獅公有鬃毛做特徵。獅子係大型貓科動物中最成功嘅，以前佢分布幾大洲，但今日佢嘅生存環境已經好細。

獅子係繼虎之後第二大嘅貓科動物，佢重係非洲最大型嘅「獵人」。獅子公身長到 1.8 米，肩高度約 1.2 米，條尾長 1 米，平均重 225 公斤。獅子乸身長到 1.6 米，肩高度約 1 米，條尾長 0.85 米，平均重 150 公斤。非洲南部嘅獅子最大，亞洲嘅最細。

African-lioness-using-termite-mound-as-vantage-point.jpg

獅子特徵
獅子毛短，呈黃色，獅子公有好長嘅鬃毛，一般深啡色，亦有黑色、淡啡色或紅啡色。啲鬃毛由塊面一直生到膊頭同心口，有鬃毛嘅獅子喺鬣狗同其它食肉目對手眼中睇起嚟大隻啲。

另一種理論話長鬃毛更吸引獅子乸。野外觀察似乎證明特別深色同長嘅鬃毛的確對獅子乸更吸引。亞洲獅嘅鬃毛比非洲獅短啲。獅子仔冇鬃毛。一般獅子仔需要五年時間先出齊啲鬃毛。

獅子的生活環境
以前響歐洲南部、西亞、印度、非洲都有獅子。冰河時期有一個亞種響中歐同北美洲生存過，冰河時期之後佢哋就消失咗。一般認為歐洲嘅獅子喺公元一世紀由於人類嘅活動絕晒種。

【1975年獅子非洲分怖圖】

今日絕大多數獅子住響非洲撒哈拉沙漠以南，撒哈拉沙漠以北嘅獅子喺1940年代冇晒。20世紀時喺亞洲嘅獅子幾乎全部絕晒種，只係響印度嘅一個自然公園重淨番一啲響度。以前除咗森林之外，所有嘅生態環境都有獅子，今時今日佢哋嘅生存環境大大縮細。獅子比較鍾意草原，亦會響旱林同半沙漠中出現，就唔會響沙漠同埋雨林住。

界 (Regnum): 動物界             門 (Phylum): 脊索動物門
綱 (Classis): 哺乳綱                目 (ordo): 食肉目
科 (familia): 貓科                   屬 (genus): 豹屬
種 (species): P. leo

鸚鵡王子 · 發表於 2012-10-16 17:38:14

社會結構
同其他大型貓唔同，獅子係一班獅子住埋一齊嘅，一個獅子群主要由有血緣關係嘅獅子乸組成，地形同埋獵物嘅多少決定一個獅子群嘅大細，一個群有 3 至 30 隻獅子。獅子公只會留響一群獅子裏面留一段時間，之後佢就會離開，去另一群獅子度。雖然係咁，獅子公嘅地位高過獅子乸嘅地位

一般一個獅子群只有一隻成年嘅獅子公，獅子仔只會留響一群獅子裏面留三年，之後就會被趕走，而獅子乸會留低。後生嘅獅子公會唔穩定咁「一班人」走埋一齊，過住遊遊蕩蕩嘅生活，直到佢哋自己變成一個獅子群嘅阿頭，一般要到六歲或更老先可以做倒。

一般嚟講，當隻獅子公老咗或變得虛弱嗰時，就會有後生嘅獅子公向佢挑戰，輸咗嘅獅子唔係死就係走路，假如新來嘅獅子打贏，佢就會殺晒以前生落嘅獅子仔，咁呢就比較容易同啲獅子乸交配。班獅子會用屎、尿、好遠都聽倒嘅叫聲嚟霸地盤。冇地盤嘅一班獅子會四圍遊遊蕩蕩。

繁殖
雖然獅子公響一班獅子有好高地位，但係只係得隻獅子乸同意先可以同佢交配。如果獅子乸願意嘅話，佢就會趴響地，畀隻獅子公騎住。只要睇下獅子乸點對隻獅子公，就知隻獅子公地位有幾高。同埋，知道佢會唔會下次打唔過而被趕走。

獅子乸陀獅子仔四個月到，只會生兩到四隻。獅子仔重1.5千克。獅子仔唔單止可以啜阿媽奶，重可以啜其他乸嘅奶，皆因養獅子仔係成羣獅子嘅責任。獅子仔出世四個月之後會戒奶，之後重會跟阿媽兩年。獅子乸要三年先大，公就要五年。

African-lioness-carrying-two-month-old-cub-in-mouth.jpg

獅子有廿年命，不過通常係乸先有咁長命。公通常未到呢個年紀，唔係俾後生殺死，就係俾後生嘅趕走。趕走之後就唔會再入到另一班獅子，跟住隻公就會餓死。所以，獅子公好少會過十二歲。不過響動物園，有啲獅子可以有成三十四年命。

食物
一般係由獅子乸打獵，獅子公只係響佢哋後生、鬃毛未出齊嗰陣先學打獵。啲深色嘅鬃毛好容易俾佢嘅獵物發現，唔容易捉到獵物。一般佢哋先匿埋，接近啲獵物，然後撲向獵物，撳佢落地，細嘅獵物一般被咬甩頭，大嘅獵物咬斷頸或被壓到窒息而死。由於成功捉倒獵物只有一至兩成，通常打獵會響夜晚或清晨涼爽嗰時候進行。

獅子的獵物包括羚羊、小羚羊、牛羚、斑馬、兔仔、雀仔、有時會係魚。食捉倒嘅獵物係要論資排輩嘅（跟喺斑獅子嘅地位高低而定）：獅子公先，然後係地位最高嘅雌性獅子，獅子仔最後。同一班獅子往往會為咗地位呢樣嘢爭餐死嘅，大打出手，往往會整嚫、整傷。獅子亦會食腐爛嘅肉，被踢出嚟嘅獅子公一般只食屍體，或者去搶其他食肉動物好似豹或獵豹嘅獵物，亦會喺鬣狗口中搶嘢食

獅子的威脅
如同非洲其他大型動物，對獅子嚟講最大危險係人類捕獵。過去幾年，全部有獅子出現嘅地區，獵殺嘅情況已經減少，回復到可以容忍嘅地步。

病係另一個最大嘅威脅。1995年響南非嘅克魯格國家公園，首次發現會攞獅子命嘅肺結核。響公園嘅南面，90% 嘅獅子已經染咗呢隻肺結核，重向北部擴展緊。隻病係由佢哋嘅主要獵物之一——野牛——身上感染返嚟嘅，而野牛係同家牛接觸後先至被感染嘅，野牛嘅感染率達 70%。呢種病響獅子身上主要影響消化系統，染病後會變得衰弱同瘦，一般幾年後就會死。