王慧麟: 愈融合愈要走

vincen_k

http://www.am730.com.hk/article.php?article=122127
http://www.am730.com.hk/article.php?article=122337
香港不乏議題，證明呢個城市接近爆煲，少啲EQ隨時會嚇到暴斃。早幾日港中矛盾(唔係中港，今次事發響香港，唔係深圳)再次響上水火車站爆發。一張手寫標語：「中國人滾回中國」，據說激親深圳之同胞，鏡頭所見有人被人打一巴。
同日嘅新聞，就係中國各大城市有出現反日示威，大家都在示威，但目的卻不同，顯見兩地之差異。
上水示威人士手寫嘅標語，唔係打印出來，都似係一個由心裡發出的聲音，有感而發。現實係，上水火車站搞成點？日日響中環返工，晚上出席中資酒樓內街坊樁腳之大小啟動儀式的香港紅色高官，當然唔知。呢幾日，無咗示威之後，各位讀者去上水火車站就知道。香港啲警察叔叔／師姐，響上水火車站閘口前面，即使拖行馬，都係管唔掂。
嗰啲水貨大哥／大姐，膽正命平，對住港警粗口爛舌。坦白說，我吔警察只係識得對八十後噴胡椒扮晒威武啫，對住呢班深圳惡爺，無晒符！一山還有一山惡，呢班水貨客，閃返深圳就追查唔到啦，係未？
我問過一位響遊客區賣奶粉之中小企東主。我問佢，點解可以依家，香港落單，深圳拿貨，甚至速遞全國，唔使啲客周街拿住幾十罐奶粉行街。東主曰，遊客周街攞住奶粉，點可以行街shopping呢？佢哋舖頭響深圳有一個小貨倉，儲住啲貨，三日唔埋兩日，就要響上水一帶，搵水貨客帶貨上去擺也。
東主又話，呢個其實係一個水貨供應及物流鏈。水貨客帶上去之後，就會放響佢個倉嗰度。但係，個倉又唔係放得落太多貨，因為好容易會俾緝私掃場充公，咁就貨去樓空，損失慘重。
我問佢，咁大嚿嘅貨，係人都知係走水貨，點解上面海關唔拉呢？東主笑曰：據佢所知，水貨佬背後嘅集團，同上面嗰啲非常又極少數兼少之又少而且又極端少數之害群之馬，打晒眼色，關係不言而喻啦。
水貨佬會知道，上面海關，邊一隊幾時做嘢，邊一隊唔係做嘢，於是就要響唔做嘢之時，成車成車咁樣過關。到咗上面要拉人交差嗰陣，部分水貨客例如著咗某啲顏色嘅衫，就會有規有矩咁樣，響閉路電視下被搜查，人贓並獲，做場show啫，大家同胞都明白啦。
東主話，佢哋唔能夠擺太多貨響深圳嘅倉，因為即使過咗關，上面都係唔安全，因為有緝私嘛。喂！你俾咗水，過咗關，都係關口嗰班極之非常少數嘅人有得分，上面其他執法部門嘅極少數害群之馬，無得分嘛。所以，呢個所謂嘅倉，都要成日搬，頭都痕！
香港部分中小企東主之奶粉「香港買貨、深圳速遞」做法，其實係講緊一個水貨產業鏈。當一個產業，大到要上面好多極之少數又少之又少兼非常少數嘅害群之馬，都要爭奪呢塊「肥肉」的話，嗰啲「一簽多行」之推動者、利益團體，已經壯大到騎劫公共政策，搵你著數。北方人士以「融合、同城化、人心回歸工程」呢類咁義正詞嚴的政治口號，幫走私水貨集團大開中門，香港政府如何頂得住？
因此，最大件事嘅係，呢班利益集團的目的，其實只係搵快錢。香港人之承受力？香港政府反對？唔關佢哋事！
話時話，香港政府上次只能叫上面，響深圳非戶籍居民「一簽多行」暫緩，而唔係叫停，大多可想而知，呢一抽嘢，背後幾咁龐大複雜。香港人叫人哋唔准來，等同阻人發達，後果會點呢？
有去過中國大城市嘅人都知，某些經常往來香港之大戶，佢哋都係出入北面之大城市機場。呢類機場，因應國際化要求，旅客拿完行李，出境已經唔使過X光機。如果閣下有錢，搞走私高級水貨，花多些少機票錢，抬住成喼LV，經嗰啲國際化機場入境，連「疏通費」都唔使俾！
上次港大民調都知，響一個「二元對立」的香港人及中國人之身份認同調查中可見，愈後生之香港人，愈多認為自己係香港人。我唔知點解，但我唔覺得，後生仔或者MK仔女識咩嘢叫「主體覺醒」，而係切切實實地感受到，自由行影響緊大家生活。
上次台灣總統選舉，我同一位民進黨搞心戰的老友閒聊。講開香港自由行出現之「反蝗」效應，呢位老友不以為然，仲認為台灣都應該多些開放俾陸客自由行。
老友話，台灣中小企、小商販、小市民生活唔係咁好，陳水扁搞到經濟一鑊粥，國民黨成日話同中國合作係好事，平民百姓日日被「洗腦」，覺得中國資金係打救台灣之唯一出路。老友說，民進黨睇到香港經濟、社會及政治俾人哋控制晒，苦口婆心話唔好，應該煞車，但反而就俾小市民鬧佢哋僵化老土。
老友說，既然係咁，倒不如等台灣人民親身感受一下，嗰啲自由行來到，搶奶粉及日用品等行為，等佢哋親身體驗陸客點樣影響到日常生活之後，嗰啲小商戶小市民就會明白，原來陸客太多真係唔掂，到時佢哋至會明白民進黨所講嘅嘢係啱嘅，咁下次總統選舉，民進黨仲有啲希望。
我聽完都有啲心翳，以前上面鎖國，大家對中國有美好嘅想像。依家講開放講融合，大家見到真正現實嗰一面，又點樣呢？我唔識答，因為就算日日俾大家「光復」上水站，水貨客會沿著鐵路南移，到時就站站有水貨，可能要等佢哋響中環站拆貨之時，我哋偉大的政府官員，至識得認真做嘢。

adamscheung

港獨...