搞波不離父子兵

man36951

2012/09/17

貝鈞奇貝可泓各盡「公民」責任
公民班主貝鈞奇（貝生）與擔任行政總監及教練的兒子貝可泓（Calvin），是香港足球壇著名的一Pair父子兵，自04年升上甲組以來，兩父子先後聯手奪得07/08年度足總盃及10/11年度銀牌錦標，今年上半年更舉家出動帶隊征戰亞協盃，所以話佢哋搞波不離父子兵絕對冇講錯！
⋯⋯
內外分工 互不干預
現年63歲的貝生是香港體育界知名人士，擁有超過四十個體育會重要職位名銜，在足球圈更是身兼多職，包括足總副主席、公民班主，亦是多支乙、丙組球隊持牌人，在足球圈交遊廣闊。至於29歲的Calvin於07年加入公民，擔任行政總監及教練，成為球隊「第二代領導人」，雖然貴為「太子」，但球隊大少事務佢都親力親為，係貝生嘅好幫手。

父子檔一齊搞波，貝生坦言可以增進感情，去球場睇波就係家庭活動，不過兩人始終身份唔同，兩仔爺都會分工合作，但內外事務就互不干預。貝生說：「足球圈人事非常複雜，一切對外事務我都會攬上身，球隊嘅行政工作，就放手畀Calvin打理。」

教波之餘 做埋打雜
Calvin自言是體育癡，自細就跟住父親周遊列國睇波，加拿大讀書期間更迷上各類型體育賽事，為咗執教公民，更走去考教練牌，實行邊學邊教：「球圈啲是非嘢唔啱我，而我亦做唔成甲組球員，於是咪向教練方向發展囉，其實除咗教波，球隊內好多雜務例如宣傳呀、更新球會網頁我都要一腳踢，忙到好似打雜咁，不過我其實都好enjoy o架！」

泓願：爭權逐位咪搞我
Calvin除打理公民，同時亦有參與電視台體育評述工作，並在體育版專欄撰文，以多重身份在體育圈發展，尋找自己理想。對於自己的父親在足總身居高位，又是多支球隊的持牌人，Calvin對於這些複雜的事務及人事關係只感到頭暈腦脹，完全冇興趣，只是覺父親很本事，他說：「我呢個人完全唔會同人爭拗，亦無意去爭逐權位，只想專心做我喜歡的事，那些事務還是留給父親處理吧！」

奇想：少少成績唔收貨
貝鈞奇在香港體育界浸淫數十年，搞波經驗豐富，但從不插手干預教練工作，即使教練是自己兒子也不過問，但原來他對兒子的要求好嚴格，就算Calvin已搞出一點成績都唔收貨。其實公民在Calvin帶領下先後捧過足總盃及銀牌，又踢過亞協盃，但對Calvin的表現，貝生的評語只是「不過不失」：「可能別人覺得佢已經做得唔錯，但作為父親，我認為佢仍在學習階段，可以做得更好。」

ng9gee

睇0黎佢兩仔爺都幾好感情..

賣魚佬

父子檔一齊搞波，可以增進感情，去球場睇波就係家庭活動

a very good way to build up rapport within family