酒店趣事(1)《婚宴前請仔細考慮應否請前度》註：真係好長

lionhk2006 · 發表於 2012-8-31 23:29:06

本帖最後由 lionhk2006 於 2012-8-31 23:36 編輯

好啦，正經嘅講完，咁就當然係講下啲返工嘅得意嘢啦..
highlight咗嘅術語，最下面有解釋
----------------------------第一幕----------------------------
有一次返工，做嘅係婚宴，因為都做得耐啦，所以多數都係做枱，
我如常做枱嘅工作，幫客人酙酒水、舖餐巾等等預備功夫，
我個圍12人，係佢哋傾計嘅字裡行間已經可以肯定係新娘嘅朋友，
咁哩間酒店係打枱河嘅，咁多數都要面向台6點鐘，
因為酒店多數都唔可以用側面、背隻對住主家席，
應該要用正面，咁先係對主人家有禮貌嘅表現..
咁係個枱呢，有位男客人，一開始我問佢飲啲咩，
佢就話:"我淨係要紅酒"(而個枱就只有佢飲紅酒)，
咁我比一杯佢啦(我酙咗隻杯嘅一半，因為我係開席前酙酒都會酙好滿下嘅)
----------------------------第二幕----------------------------
我set好晒位(宴會仲未開始，仲入緊席)，
見好多個都飲咗一半，咁我又去幫佢哋酙啦..
幫個男客人酙個陣，佢話:"我想要滿啲，唔該"
得，冇問題，鍾意飲酒嘅男人見怪不怪，酙到個杯四分三，
(因為紅酒杯越滿就越危險，我怕一陣唔小心倒捨整污糟就唔好啦)
之後放返好支紅酒，轉個頭，個杯紅酒冇咗

，
好，唔緊要，再問:"請問仲要唔要添啲紅酒呢?"
"要，唔...不如你成支放底啦"
嘩，唔洗自己酙喎，梗係好啦...之後比咗支新嘅佢..
之後去下後欄拎碟、出去係張枱排好，再返入後欄同朋友吹下水先出去，
結果，個支冇晒，佢見到我，就好主動同誠實咁同我講：
"哥哥仔啊，你比多支我得唔得啊？哩支我飲晒啦.."
我當然冇問題啦，啲酒又唔係我嘅，另外我見佢飲到咁狼，亦好有禮貌咁問佢:
"先生，請問需唔需要比杯熱茶你？"
佢話:"唔洗架啦，我淨係飲酒就得架啦"
佢講完，我就開始覺得奇怪，哩張枱嘅客都出晒去影相，
但淨係佢自己一個留係度自己飲，
咁我又拎咗支新嘅比佢...
好啦，終於都開席，全埸熄燈，四周圍嘅螢幕播新郎同新娘嘅回憶，
咁做待應當然唔可以擋住客嘅視線，所以我企咗係牆旁邊，(當然都係係自己張枱附近啦)
突然...係黑暗中，我見到個位男客人，向我不停咁揮動手上嘅酒樽，
傻嘅都知，佢想要多支！
佢係客，唔通唔比咩，於是梗係又拎支新嘅比佢啦，
之後佢成支隊啊！成支隊啊！成支隊啊大佬！
唔通你真係咁鍾意飲？！
就係咁，佢係開席前自己隊咗4支紅酒...
----------------------------第三幕----------------------------
咁上乳豬嘅時候，我分咗十二份，我拎比佢個陣，
佢話:"我唔要！"
咁我都唔為意...
之後分第二個第三個都唔食，
之後我問佢:"先生請問你係咪食素架？"
(因為有啲客係食素，廚房可以另外預備比佢哋)
佢答:"唔係"
我

:"吓？"
之後佢啲朋友話:"唔洗理佢，佢飲醉咗"
如是者，佢繼續飲，我繼續分，
之後去到食翅，
佢就係咁講以前同新娘一齊個陣幾開心幾甜蜜，
跟住我就要酙返啲嘢飲，
因為差唔多要開始敬酒啦..
我見佢飲晒，我就話:"唔好意思啊，我幫你添返啲紅酒，陣間主家會開始埋哩敬酒"
佢就好決絕咁話："唔洗住"，仲遮住隻紅酒杯，唔比我酙，
之後佢啲朋友就拉佢出去，話去廁所，
咁我當然急急腳去酙返杯紅酒啦，
吉杯會比經理話，主人家見到亦唔好意思，
之後佢哋返到哩，
主人家敬酒都差唔多到我哋哩圍，
佢竟然一啖飲晒啲酒 (到底知唔知我酙得好辛苦架

)
到哩圍敬酒啦，成枱起晒身，得佢一個坐係度

(好耶，你型！)
新娘眼尾都唔望下佢，但新郎仲好好奇點解佢仲坐係度個陣，
佢哋成班人就走啦，咁個新郎都只好走啦，
唔知點解，我個人覺得哩圍枱嘅敬酒速度比其他枱都要快.....好多

----------------------------第四幕----------------------------
咁敬完酒啦，我都要繼續分餸，
佢都係一啖都冇食過，
佢朋友都問佢:"你真係唔食啊？"
佢話:"我係唔會食個個男人比錢嘅嘢架！"
(咁你又哩？仲要比埋人情)我心諗

(你都傻嘅，自己比錢搵氣受)
之後到食飯同面，我一路分，
佢就一路講佢個陣比新娘飛咗之後，
又點樣cool煲，又係公園等咗幾耐，
但新娘都係唔理佢。
到到宴席完，新娘新郎再同親友影相，
佢都係冇上去，都係自己一個坐係度飲酒，
等到佢朋友返哩，佢哋就扶佢住啦。
----------------------------END----------------------------
新娘就傻嘅，
前度你就咪請佢哩啦。
人情$500，你好差個5舊水咩洗？
哩個個又short嘅，
哩咗又唔食，人情又比咗，
又要唔開心，咁哩做咩呢？
如果係我，
一係就一收到請帖就當面撕爛，
一係就哩，樣樣打包樣樣拎走，仲食多兩份！
各位，唔該結婚前，真係諗清諗楚，係咪真係要請你前度哩，
唔好話冇所謂，
有攝影機架，個攝影師唔知你咁多架，
一陣影底咗，
到時你開開心心睇返，我就真係唔知你仲笑唔笑得出哩..
再唔係.....結多次，唔好請佢囉...

----------------------------術語解釋----------------------------
做枱：負責拎菜、分菜
枱河：在枱上分菜
更多酒店術語，請看小弟嘅《酒店行內術語》
http://141hongkong.com/thread-1030604-1-1.html