如何開始學潛水

呀吓 · 發表於 2012-8-10 15:43:36

大家如果有興趣睇下點樣開始去學潛水的話，可以繼續睇落去！

大家可以選擇係香港學定係外國（例如菲律賓或泰國）學，本人就建議係香港學既，原因如下：
1 大家都係用廣東話溝通，一定唔會聽到d聽唔到d，話晒都係關乎自己條命，小心最重要。
2 香港水域未必有外國咁清，有時會濁d視野唔係太高，有d地方係泥底更容易影響水底視野，所以如果能夠克服香港既環境，咁去到外國就一定會「手到拿來」輕輕鬆鬆。處理任何危機時都比較有信心。
3 外國學習由於時間局限，所以理論課會「比較」急趕，相對黎講係香港大把時間可以慢慢安排唔識問到識。
4 以我認識既教練黎講全部都會對學生要求好高，因為關乎人命安全，但係外國教練由其是菲律賓既就要碰運氣了。

學習潛水我建議最好能夠找個伴一齊去學，因為潛水係最著重 Buddy System，即係落水時直到上水都係一 pair pair 既，令到大家係水底都能有照應，而你係要對你既buddy能夠完全信任至得，所以學既時候搵個信任既伴就會比較好。

報名學潛水可以係潛水中心報名，香港有唔少潛水中心有辦潛水課程，水準亦差不多，所以只要係網上找一找就可以搵到好多資料。初級開放水域潛水員課程費用大概係3000多，視乎包唔包潛水器材租用費。

關於器材，一般而言初學者都唔建議買 full gear，除非你大把錢（大把錢不如益下四台兄弟），因為你唔會知邊種款式最岩你用，而且你又唔肯定自己會唔會沈迷落去，我見都會有唔少人每次出海玩 fun dive 都係租 gear 既，所以支出唔會好多。

學成之後每次出海玩（我地叫 fun dive) 咁又要幾多錢呢？其實玩一整日，朝早八點至下午四點返碼頭，包飲品午餐（有間仲係BBQ幫你燒埋添！），氣樽，任潛（通常我地最多潛到4次，每次潛約一小時，潛得再多d會好攰同易頭痛）只不過係$580，而另租 full gear （BCD, Regulator, wetsuit, Mask, snorkel, fins, 鉛帶）都係$240。有d潛水會如果入左會既話就更會有折扣（日潛$500，gear $180）。圍起上黎只不過係$820，抵過食HG！　當然以上只係參考價，唔同潛水會既內容同活動都會唔同。

而每次進行潛水活動，個潛水會都有責任提供潛水長甚至潛水教練一齊落水提供支援既，如果係學員既話就一定會有教練係你身旁或視線範圍之內添。而初學成者亦會有潛水長可以安排同你地一齊落水。係安全考慮上一定會係佢地驚過你！至怕你玩得忙形得濟忘記安全！

而潛水地方通常都會係西貢沿海一帶，近如橋咀，牛尾，赤洲，海下，大霸；遠至果洲，東平洲都會有，視乎當日氣候水流天氣。

打咁多野唔係叫你地搵我介紹教練及潛水會，只係想鼓勵大家去認識多一樣消閒活動！

多　謝　欣　賞