熱玩 Cool夏：寫真孖妹Jumbo & Vivian 教擺 Pose性感唔反感

嚦咕嚦咖 · 發表於 2012-8-4 02:14:47

熱玩 Cool夏：寫真孖妹Jumbo & Vivian 教擺 Pose性感唔反感

夏日炎炎，梗係要出吓沙灘影吓靚相。今日就搵嚟兩位啱啱出咗寫真集嘅 Jumbo同 Vivian，醒吓大家擺 Pose貼士，凸顯長處、遮掩短處，人人變索女。加埋幫 Jumbo影寫真集嘅 Lio教路攝影技巧，咁就可以女夠索、男夠 Pro，齊齊影番輯索爆夏日照，為2012年盛夏留個美好回憶喇！

嚦咕嚦咖 · 發表於 2012-8-4 02:15:29

挨欄趷腳變靚啲

Jumbo同 Vivian喺今年一眾模中都算標致，所以好多宅男 Fans都爭住買佢哋本寫真集。問到兩位擺 Pose多過坐巴士嘅靚女，到底點先叫靚嘅肢體語言？佢哋不約而同話：「其實都無乜秘訣，總之就係要靚嘅盡 Show，醜嘅盡遮囉。」吓？具體啲得唔得？細細粒又帶點 Cool嘅 Vivian即時鬼馬搶答：「好似我呢啲身形比較嬌小嘅女仔，就盡量搵嘢挨，或者企喺比自己矮嘅物件如欄杆、長椅旁邊，加埋小小趷高同屈腳，望落即時高番晒！」陽光味較重嘅 Jumbo接力：「係女仔都鍾意瘦㗎啦，影相時不妨多啲扭身，又或者將隻手擺喺盆骨上面，影出嚟自然瘦好多。」
另外亦要留意，手腳應多屈曲擺動，能有助豐富攝影構圖，增強身軀美感。問到兩位有乜最愛 Pose，原來 Jumbo就最鍾意玩回眸， Vivian則愛特寫大頭，竟然兩樣都唔係 Fans們最恨睇嘅部份。「 Sexy唔一定要 Show胸、趷籮嘅，表情搭演技一樣可以流露性感。」係我多心，硬係覺得矛頭開始指向 Phoebe。

擺跪地 Pose時，大髀同小腿要盡量分開，唔好拍埋，對腳自然瘦啲。

加杯清凉特飲，增加夏日感之餘，亦可令構圖更豐富。

多扭動身體，亦可令身體感覺更瘦。

]