上一代門神朱皮

man36951

香港足球喺6、70年代，可以話踏入全盛時期，能夠喺甲組立足嘅球員，並非等閒之輩。土產優質門將更加係出類拔萃，好似有何容興、朱柏和、朱國權等，今集《球迷奇遇記》就請嚟香港一代門神朱國權，佢除咗講自己足球生涯之外，仲會大談近代港產門將。

華：聽講你最初唔係踢龍門出身？
權：係呀，其實細個喺麥花臣踢波都唔係打龍門，以前我細個係睇劉添踢波大，見佢踢閘踢得咁好，自己一路都係跟佢學嘢，係之後去到流浪先正式改打龍門。

華：咁流浪係咪你第一間球會？
權：係呀，當時生活水平唔好，有球會肯簽我，梗係應承啦。嗰陣200蚊1個月簽兩年。

華：不如你講吓你喺流浪嗰陣係咩情況下做龍門？
權：嗰陣本來踢緊閘同中堅嘅，但因為雷煥旋扭計話要加人工，咁畢特利就叫我踢龍門，同埋嗰陣球隊防線有馬迎祥同黎新祥頂住。其實我冇受過龍門正統訓練，初時我連龍門球都開唔過半場！

華：流浪之後，去咗邊間會？
權：喺流浪踢咗1年，我就代表香港青年軍踢亞洲盃，可能表現幾好。精工陳輝洪就同我講，叫我去精工做何容興後備，仲畀成千1,800蚊人工，係流浪幾倍，仲有當時精工畀咗流浪成萬蚊轉會費。之後嗰年林方基又嚟埋精工，我出場機會又唔係太多，所以咪過檔加山踢咗兩年。可能我喺1977年世界盃外圍賽表現幾好，霍英東就搵我踢東昇。

華：你依家係公民嘅守門員教練，之前亦都係港隊嘅守門員教練，你覺得近10年土產龍門質素點呢？
權：以前我成日帶港隊出去比賽，龍門始終係最弱嗰環。有3個龍門稍為好啲，鍾浩然仲差啲身材；陳家麒就有身材但協調方面仲需要改善；係得范進業係可以達到亞洲水平。

華：咁依家現役啲龍門呢？
權：葉鴻輝嘅技術就比較全面；謝德謙嘅狀態就較大起伏。我反而擔心香港龍門青黃不接，謝德謙係1985年（出生）、葉鴻輝就係1990年，兩個已經晉身大港腳，暫時我都睇唔到有邊個1994年嗰批青年軍可以接到班，因為依家好多龍門唔係肥仔就係唔多識踢波。

華：咁你覺得守門員教練重唔重要？
權：我覺得好重要，但香港就覺得係浪費，因為通常練唔夠一陣就要鬥波，咁個龍門相對就練唔到啲咩。其實龍門有好多嘢可以練，好多人話只要接好個波就得，但其實接波係最後一個動作，好似當對方開始攻勢或者射波嘅時候，龍門企嘅位置、準備及動作係點都好緊要，所以我喺公民就會要求守門員早到9個字練波。

後記
朱皮（朱國權）絕對係香港一代門將，退休多年仍然努力為香港足球默默奉獻，現為公民守門員教練嘅佢，將自己多年征戰沙場經驗，傳授畀香港新一代門將
.

Wandererjc

當對方開始攻勢或者射波嘅時候，龍門企嘅位置、準備及動作係點都好緊要

果然是內行人