4-3-0陣式

JIMMYBOY · 發表於 2012-5-4 09:41:16

剛在週末一塲葡超榜尾大戰

利亞拿vs 費倫斯，主隊居然只有「8」人上陣！當中4名還是賓菲加借將！罕見地排出一個---
4-3-0陣式，以0：4見負。

JIMMYBOY · 發表於 2012-5-4 09:43:39

拖糧出事！利亞拿8人應戰吞4蛋

波圖成功衞冕葡超，但依然畀包艇嘅利亞拿搶晒鏡！尋日凌晨葡超爆咗場騎呢護級騷，利亞拿16名球員因被會方拖糧，喺主場對費倫斯賽前集體劈炮，一名球員更涉嫌夾帶私逃，最終利亞拿只得8人應戰，「僅敗」0：4，都算叻仔o架喇！

早喺賽前，利亞拿班球員因被球會拖欠1至3月、共30萬歐元（約308萬港元）人工，已醞釀同球會解約。最過癮係利亞拿對費倫斯一戰，本來已衰到填得9個人落場，中場艾普斯尼基達竟然喺最後一刻甩埋底，最終利亞拿得8人應戰，足智彩收到呢個消息，隨即將費倫斯客W由開盤嘅2.68倍調低至1.12倍，最終利亞拿「成功」喺主場吞費倫斯4蛋。

馬里中場否認偷6萬元手提袋

咁都未算騎呢，《球報》指賽後利亞拿主席巴圖路美奧走出嚟講嘢，話懷疑馬里中場艾普斯尼基達喺臨走嗰陣偷咗球會一個載有6,000歐元（約6萬港元）嘅手提袋，而且有人喺場外接應，球會已報警查辦。主席又死撐話冇聽過有球員想解約，嚟緊會處分缺席練波同比賽嘅球員，但基達就否認偷過錢。

或被賽會罰款51萬

葡萄牙《競賽報》仲話，呢場護級大戰原來差啲腰斬，好彩利亞拿最後堅持應戰唔肯罷踢，唔使被罰直接降班，但就有可能罰款5萬歐元（約51萬港元）。利亞拿教練祖斯杜明古斯賽後接受葡萄牙《球報》訪問，大讚留隊嘅球員係勇士：「我要讚揚堅持打足90分鐘嘅8位勇士，佢哋係真正嘅冠軍。」

家陣利亞拿離護級安全區成5分咁多，聯賽得番2輪，利亞拿嚟緊9成降班，杜明古斯都話只能見步行步：「嚟緊作客賓菲加，唔知到時仲有冇8個球員畀我用！」費倫斯教練軒歷基紐尼斯則表示今次事件根本有迹可尋：「早喺5、6年前，我已經有預感遲早會爆鑊甘，事關好多葡超球會負債勁嚴重，希望足總盡快正視呢件事啦！」