亞洲第一中鋒 鍾楚維

man36951

華：阿維，你係點樣入行？
維：自己細個已經鍾意踢波，所以我就入去南華做場地，得閒嗰陣啲人個個訓覺，我就拎個波去踢，有時都會同南華啲球員踢，經過一年同高手過招之後，球技大有進步，同埋我就咁識咗鄭潤如，之後佢介紹我畀畢特利識，帶我入流浪踢預備組，踢咗幾個月就代表香港青年軍去菲律賓，喺流浪一踢就踢咗3年喇。

華：嗰陣喺流浪踢成點？
維：幫流浪上陣第2場對住愉園就有「士哥」，喺流浪踢咗3年，記得有一次差啲同畢特利打架，嗰次我同石智偉遲返宿舍，畢特利就唔畀我哋入去宿舍，趕我哋走，佢閂門嗰陣差啲夾到我隻手，嗰刻我差啲想打佢，之後我直情冇去練波。因為嗰日之後，我哋銀牌8強要鬥巴士，所以畢特利惟有走嚟同我哋道歉。

華：但點解離開甲組嘅流浪，而去加盟當時丙組嘅愉園呢？
維：因為嗰年愉園重返丙組招兵買馬，加上盧德權游說我去愉園，嗰陣東昇都有搵我踢，但係人工始終冇愉園咁高，另外就係因為我覺得自己技術未夠全面，想喺乙丙組浸下，因為喺乙丙組對手冇咁勁，有好多射門機會，射到自己信心都大晒。仲有嗰時係劉添教，係佢教識我點樣頂頭槌，嗰時佢搵埋劉榮業，叫我哋提早去到球場，跟住就係叫劉榮業斬波入嚟畀我頂，練咗兩個月，終於學識點樣頂頭槌。

華：仲記唔記得幫愉園上返甲組嘅第一場波？
維：我記得69至70年嗰屆，我哋上返甲組，第一場就對住陸軍，嗰場波我仲射入兩球，嗰個球季我總共射入咗23球呀！

華：添哥（劉添）離開咗愉園之後，你哋有冇喺球場碰頭？
維：當然有啦，係人都知添哥踢波好狠辣，但佢對我愛護有加，每次都會都留我一手。

華：阿維，你入過咁多波，邊一球係你最難忘？
維：最難忘嘅入波應該都係1978年銀牌決賽對住精工，我喺左邊大禁區拎到嗰波，左腳一「級」過咗麥哥利，右腳「盪」去遠柱，嗰波弧形彎過龍門卞鎬英，嗰場最後我哋仲贏埋精工捧盃，射得靚加上呢球價值連城，所以印象特別深刻。

華：咁難忘嘅賽事呢？
維：賽事就係1977年世界盃外圍賽喇，我哋喺新加坡14日要踢5場波，我哋贏3場和2場呀。

華：點解你喺1981年退休呢？
維：其實喺1980年已經成日受傷，有次訓練突然覺得嗰膝頭好痛，咁我就去睇醫生，睇過好多醫生都話唔知咩事，但有個西醫睇完之後，就問我仲會唔會踢多3年，我就答佢唔會，咁佢就話唔使開刀，跟住我就同簡煥章講話想退休，佢同我講話想簽多我5年，我就話自己膝頭有傷，佢答我唔踢正選咪踢後備囉，鍾意就落場踢吓，但對我嚟講踢後備好冇癮。佢就話畀錢醫我，結果我去咗北京住咗3個月，但係都冇乜進展，當時喺北京就有個按摩師幫我按摩，令次按完我都可以踢番波，但一唔按個膝頭又痛番。

華：咁究竟個膝頭係咩事呢？
維：直至10年後，醫學昌明好多嘛，照到我膝頭入面個軟骨爆咗，結果就決定開刀做手術。

華：你係香港球壇第一個搞告別賽嘅球員，點解當時你有呢個諗法？
維：當時喺北京返嚟之後，傷勢冇乜進展，咁我就同簡氏講，我話見到好多外國球員退休都會搞一場告別賽，我都想搞番場，我同佢講入場收益我可以唔要，但就想球會幫我搵記者宣傳，我仲記得我個記者會係喺利園搞，就係咁，決定喺對南華場聯賽當埋告別賽。

華：「阿爺」呢個名係點樣嚟？
維：因為我養傷嘛，我就練唔到波，咁我就拎條毛巾出球場，馬毛（鄧鴻昌）就話我好似大爺咁拎條毛巾出嚟晒太陽，就係咁個個就開始叫我「阿爺」囉！

華：咁你講吓依家嘅生活？
維：依家就享受退休生活，閒時就玩吓桌球同高爾夫球，近呢一年就開練氣功去醫舊患，效果仲唔錯。

華：如果想踢好波有咩方法？
維：想踢好波冇捷徑，一定要苦練，以前包勤就帶過我去睇一套紀錄片，係講告魯夫點樣練波，佢喺中圈帶波入禁區射100球；仲有右翼不斷斬波畀中鋒重複又重複去練頂頭槌，練到熟為止。點解張子岱咁好波，就係因為佢成日踢，佢以前會一個人喺跑馬地練帶波。

後記
鍾楚維絕對稱得上「亞洲第一中鋒」，身材健碩，頭頂腳踢樣樣皆能，加上佢步大力雄，係愉園多年嚟不二之臣。

man36951

鍾楚維（英語：Chung Cho Wai，1947年9月21日－），綽號大隻維，退役香港足球運動員，曾多次入選香港足球代表隊，是香港1970年代華人首席足球中鋒，出身於流浪，其後轉投愉園，一直效力至1980年掛靴。

球員生涯小時候住在柴灣的鍾楚維，從小已喜歡踢足球，並曾與朋友組成「柴灣少年足球隊」，除了與柴灣工廠區的工人比賽外，還會在報紙小球版與其他地區球隊約戰。16歲那年，靠媽媽透過朋友介紹到南華體育會擔任場地管理工作，並獲青年軍球員鄭潤如引薦給流浪班主畢特利，正式展開球員生涯。

1965年，鍾楚維隨同首次升班的流浪在甲組亮相，直至季尾對星島的比賽才首次在甲組上陣，結果以0－1見負。其後對愉園的比賽第二次上陣，便取得個人足球生涯第一個甲組賽事入球，結果兩隊賽和2－2。

效力流浪三個球季後，鍾楚維於1968年，加盟重新加入丙組聯賽的愉園，協助愉園以三年時間重返甲組。鍾楚維在愉園初時擔任右輔鋒，其後因球隊中鋒陳中斷腳，鍾楚維才正式擔任中鋒。張子岱於1972年加盟愉園，中場創造力大為增強，鍾楚維獲得充足供應下，入球亦比之前大為增多，開始踢出名堂，並一直效力至掛靴。

1980年4月27日，愉園在香港大球場對南華的香港足總盃，是鍾楚維的告別賽，不幸以1－2見負，一代亞洲最佳中鋒正式告別球壇。

鍾楚維是香港1970年代華人首席足球中鋒，曾多次入選香港足球代表隊，更是1977年，香港隊參加在新加坡舉行的1978年世界盃亞大區A組外圍賽，取得小組出線權，晉身五強賽的主要功臣之一。

鍾楚維退休後，與球圈好友尹志強、李國華合夥開設King's Arm酒吧。他在商場長袖善舞，曾經擁有兩間酒吧、兩間食肆，並晉身成為馬主，養過「君馬」、「心情好」兩匹馬。2003年因沙士疫情，飲食業生意大受打擊，終告破產。

2006年，鍾楚維重返球圈，擔任首次升上甲組的地區球會和富大埔的技術顧問。

鍾楚維於2009年8月，在香港老牌報章《成報》專欄，他在2009年9月27日，親眼目賭愉園作客對新界地產和富大埔的甲組聯賽，在多踢一人情況下竟然以0－4大敗，其後於《成報》專欄發表「痛心疾首」文章，指摘「愉園在場中比賽的球員像變了演員，受幕後導演指導下進行演出，大埔憑什麼能以寡敵眾而大勝，大家應心中有數，畫公仔不須畫出腸來」，並揚言會熔掉愉園在告別賽送贈給他的「毋忘我會」四字金牌，引起本港球圈議論紛紛。

個人榮譽香港足球明星選舉最佳十一人 一次(1978-79季度)
香港甲組足球聯賽神射手獎 一次(1978-79季度)

Wandererjc

man36951 發表於 2012-4-17 12:16
華：阿維，你係點樣入行？
維： 自己細個已經鍾意踢波，所以我就入去南華做場地，得閒嗰陣啲人個個訓覺，我 ...

佢同尹佬屬同類型球員,射術比尹佬仲稍好添

yamamoto

JC 君 發表於 2012-4-17 23:03
佢同尹佬屬同類型球員,射術比尹佬仲稍好添

咁頭鎚同速度又邊個好d呢

Wandererjc

yamamoto 發表於 2012-4-18 01:03
咁頭鎚同速度又邊個好d呢

無乜明顯差別,南華以高Q大棍為主(梁能仁離隊之後更如此),尹佬用頭二傳仲多過攻門

愉園都有地面波,所以鍾楚維都要有速度入攝,佢射程比尹佬長遠,有時可在禁區外入波

尹佬在彈跳力都和助攻意識方面比佢好

yamamoto

咁尹志強既打法有d似希斯基
做二傳同助攻較多

super167

當FIT的鍾楚維若放在今天仍是亞洲最佳級數，以當時來說其踢法及質素可謂超越時空，尹志強腳法同速度平常唔係呢個級數，當年南華中堅梁兆華遇到鍾楚維只有食塵。愉園擁有另一位曠世奇材----劉榮業，鍾劉二人同樣是高速技術型球員，那時的愉園在實戰上經常傳球至邊線，由兩人以速度從邊線發難沉底傳中甚至直殺入禁區攻堅。鍾楚維很多時都從事側擊，他走動往往比人多，鍾身材健碩，這個天賦優點也是其足球生命短暫的主要原因，長年累月負重高速運作，膝蓋終於難以承受下去，有幸當年是個愉園球迷，由其踢丙組到退休，能夠親眼目睹鍾楚維短暫的光輝足球歲月，鍾楚維曾有一段時間表現十分低沉，那時聽說他剛娶得美人歸，體力透支也人之常情也。