大頭仔 - 胡國雄

man36951

胡國雄呢位香港一代球壇傳奇，喺70至80年代風靡全港球迷，佢帶領住精工，14年間為球會奪取40項聯賽及盃賽冠軍，成績斐然。喺當時嘅社會，就算你唔鍾意踢波，都一定識得「大頭仔」胡國雄有幾犀利！但自精工退出香港球壇，佢亦隨球會喺1986年退休 .

(李：李潤華、胡：胡國雄）

李：「大頭仔」你係幾時開始踢波呀？
胡：我自細就好鍾意踢波，喺卜公個波地大，日踢夜踢，有陣時直頭喺卜公球場瞓，瞓醒起身又踢波，12、3歲就代表卜公周圍踢，仲起埋個朵，叫「卜公三寶」，就係指施建熙、崔永生同我，當時卜公好犀利，去勻全港九，差唔多都未輸過。踢到1968年，之後就加入東昇踢甲組，不過當時只係踢預備組，同年更入選港隊，去泰國踢青年賽，之後一直喺東昇效力咗3年。

李：喺東昇有冇捧盃？
胡：當年未贏過冠軍，東昇實力「未夠班」，而且重要比賽同電話「有偈傾」，對愉園又要「互相遷就」，點贏吖？

李：踢完東昇，點解唔吼消防揀南華？
胡：當時消防同南華一齊搵我，我放兩張紙仔喺櫃桶，一張寫消防，一張寫南華，點知一抽就抽中南華。不過我當時唔忿氣，因為消防獎金高啲，但壓力會大啲。結果再抽多次，都係南華，唯有踢南華囉！其實早一年南華已經想我過檔，但當時傾唔成。

李：東昇冇留你咩？
胡：東昇人工只得400蚊，邊留到我。佢哋想同我講感情，但踢波好似做舞小姐咁，得10年8年青春。南華一個球季畀成16,000蚊我，當時球壇係10個月波糧，即係1,600蚊一個月。結果我一踢南華，就贏咗3個冠軍。計埋獎金，一季賺成兩萬三。

李:踢咗一年南華後，點解又去精工？
胡：當年精工升班上甲組，想搵我同仇志強過檔打江山，由石修老竇帶我哋兩人去到中環見班主黃創山。佢哋開價36,000蚊，但我當年心頭高，開大口要夠4萬。結果72年嗰屆就過檔精工，第一個球季就贏咗4個冠軍！

李：其實精工當年咁多外援，尤其係荷蘭球員好出名，你點同班外援相處？
胡：其實踢波係身體語言，我當時就想班外援知道，香港有一位球員叫胡國雄，佢哋唔係特別叻！班外援開頭就牙擦擦，但一同我踢完波後，全部收晒聲，因為服咗我！我心態係，你踢得叻過我，先好出聲！

李：咁多個外援，有邊位印象最深刻？
胡：後期覺得好波係韋伯，有默契就係「大水牛」華德，一傳波畀佢，就衝上前，接應入波。

李：香港球員中有邊個球員最合拍？
胡：「蛇仔」黃國安，佢幾好技術，足球意識都唔錯。

李：踢精工有冇壓力？
胡：其實都好大壓力，因為做隊長，要帶起隊波，而且年年有冠軍，所以冇盃捧會好唔自在。另外，當年贏波多，追獎金最麻煩，哈哈！當年好多隊友要供樓，經常要我呢個隊長向老闆追數。

李：你同班主黃創山關係好似好微妙？
胡：我同佢算好朋友，佢唔當我係伙記，我又唔當佢係老闆。我又唔會同佢計較人工，不過我有需要幫手時，佢就會幫。好似我要借錢買樓畀阿媽，佢又借畀我，我要開鋪頭，佢又借畀我，10萬8萬都借畀我，總之會喺我人工度扣。

李：其實喺精工踢得咁輝煌成績，有冇外國球會搵過你？
胡：喺1978年，巴西嘅高士路曾經搵我同仇志強過去，仇志強都有問我意見，我話打前鋒同龍門點同？做龍門唔使跑嘛！但我就唔同，要出去踢周圍走，而當年我曾患慢性肝發炎，未必頂得順，何況喺巴西又言語不通，佢哋講葡文，雞同鴨講，喺外國一定被排擠！

李：當年你一定係其他球隊嘅眼中釘，好多人防守你，有冇邊位球員你覺得最難應付？
胡：鄭國根，經常掃我腳，有時我會好嬲，個心諗，如果佢再踢我，就踩番佢！不過做前鋒俾人踢好正常，我都預咗，所以要睇自己容忍力有幾多；不過完咗場就乜事都冇，大家搵食啫！

李：職業生涯有冇受過大傷？
胡：最長都係10日，當時要跟港隊去新加坡踢世界盃外圍賽，每日都做物理治療，最終都有落場踢。

李：當年黃創山大哥黃創保嘅寶路華升班，佢又有冇搵你過檔？
胡：當然有，詹培忠有嚟問我，我話冇所謂，但要兩位班主黃創山及黃創保，兩兄弟自己傾掂佢；當年連埋佢哋爸爸，3個人開家庭會議，結果我留番喺精工。

李：有邊位教練你最尊重同敬佩，同教到你乜嘢？
胡：1980年精工去英國高雲地利做季前集訓，練咗5個星期，有位教練叫史密夫，佢教到我踢波以及做人嘅心態，而且佢仲會做埋心理輔導。當年有場波，半場落後0:2，喺休息時佢鼓勵我哋，結果場波反勝4:2。而且做教練要有計劃，又會識得刺激球員思維同鬥志，真係唔簡單。好似有人叫我做教練，我覺得「嘥氣」，我點教你踢？我做到嘅嘢，你又做唔到！「把鬼」咩！做教練，要有教材，有口材，又要識心理，唔啱我！

李：你個仔點解唔繼承父業踢波呢？
胡：當年帶佢去周文曦隊晨曦踢波，但排咗兩個鐘都冇得踢，「把幾火」就唔畀佢去晨曦踢。好彩佢踢唔成波，讀書仲好叻，成日考第1，依家做埋老師，真係要多謝周文曦。

李：其實外界傳你好少練波？
胡：我唔係少練，我只係人哋跑得快過我，因為我身為隊長，一定要做到足，以前晨操晚課我都做齊。好似跑步咁，你快我半個圈冇所謂，但我練足就得。

李：有冇邊個門將好難射入？
胡：冇咩門將我射唔入，不過叫我揀，我覺得仇志強唔錯。

李：當年足總要搞全華班，與大批外援嘅精工出現矛盾，究竟當中有咩故事？
胡：其實足總由乙、丙組話事，要投票。有咩事佢哋就反對，精工點玩？老實講，一吓子趕走晒啲外援，其他華人根本就冇咁好質素，賽事嘅水準一定大跌，精工係商業球隊，搞波係為名，想話叫外隊嚟比賽宣傳吓，又俾人反對，老闆都搞到心灰意冷，最後咪決定退出，而我都一樣覺得冇癮，咪跟埋收山囉！

李：對香港球壇有咩意見？
胡：我冇睇香港波10年，都唔識啲球員，依家啲波都唔好睇。

李：你經常飲酒，會唔會影響踢波？
胡：冇問題，我飲酒全世界都知，但我照踢波，我都有同老闆講，唔好理我私生活，總之我交足功課就可以。

李：最高峰有幾錢人工？
胡：1983年搵25,000蚊一個月，話說當年老闆問我嗰時攞幾錢人工，我話得15,000蚊，佢聽到呆一呆，話咁少？卒之加到我25,000。

李：喺精工同南華踢波有咩分別？
胡：喺南華踢波，班「擁南躉」捧到你上天，佢哋都唔識波嘅，個波踢出界都話你叻。喺精工嘅球員質素好啲，隨便踢都贏。

李：最深刻邊場球賽？
胡：「5．19」世界盃外圍賽贏中國，同埋對朝鮮嘅比賽，半場落後0:2，之後反超前3:2，點知大家都放鬆晒，臨尾至失波，搞到加時，我記得場波踢到夜晚11點幾，最尾互射12碼輸埋。

李：當年點解退休唔做教練？
胡：退休後去過好易通做顧問，但踢波係教唔到，呢門嘢係功多藝熟，一定要由細踢到大，好似山度士係由細開始，咪踢得勁囉！所以好似車路士學校同阿仙奴學校咁，先教到人。

man36951

效力南華三奪冠軍

man36951

南華對東方

zzza

佢的確係有料到既
抵佢咁串
近代得山度士有得同佢揮下

Wandererjc

胡國雄當然係一代名將,

不過亦反映左香港足球o既問題,

佢o既年代,香港球員在體能上已經落後中日韓,僅憑技術周旋,但都輸多嬴少

話就話亞洲一線,實際上是一線尾

這是環境問題,踢小型球出身,技術一流,體能三流

胡國雄就是腳法好,反而無再進一步去谷,因為已經無敵了

現在的就更不用說,腳法沒可能練得似胡國雄,體能仲差

zzza

JC 君 發表於 2012-4-16 11:39
胡國雄當然係一代名將,

不過亦反映左香港足球o既問題,

香港足球, 連生意同運動都未分清楚
球員打幾年就無心去操, 連大陸足球都比唔上
真係唔要個香港足總, 香港組隊上去大陸參加聯賽好過
香港聯賽咪改改佢變成香港隊既預備軍, 咁重好
除左早幾年南華引到d人入場之外, 其他賽事真係唔掂

Wandererjc

zzza 發表於 2012-4-16 12:14
香港足球, 連生意同運動都未分清楚
球員打幾年就無心去操, 連大陸足球都比唔上
真係唔要個香港足總, 香港 ...

"球員打幾年就無心去操"一針見血

將陳七呢d大少爺捧上天,5皮野一個月?!何德何能呀?唔好期望佢更進一步,叫佢戒煙先啦

zzza

JC 君 發表於 2012-4-16 12:41
"球員打幾年就無心去操"一針見血

將陳七呢d大少爺捧上天,5皮野一個月?!何德何能呀?唔好期望佢更進一步, ...

5皮野一個月, 原因係南華需要一個偶像去谷足球
點知條友咁無用, 又唔衰得, 唉

man36951

現在香港足球員, 拎到5皮野一個月既本地球員, 相信不多. 有次看電視一個節目, 訪門公民既高層, 都表示過, 他們的球員, 月薪超過2皮野既都不多.

yamamoto

唔好話胡國雄
依家香港想出番個山度士都難
最離譜陳七都俾人捧上天
講真佢連歐偉倫都不如